Yaponiya O‘zbekiston shifoxonalariga mammografiya uskunalari yetkazadi
2025-yilning 14-noyabr kuni Yaponiyaning O‘zbekistondagi elchisi Kendi Xirata va O‘zbekiston sog‘liqni saqlash vaziri Asilbek Xudoyorov o‘zaro hamkorlik doirasida muhim hujjatlarni imzolashdi. Bu haqda Zamin.uz xabar berdi.
Ushbu hujjatlar iqtisodiy va ijtimoiy rivojlanish dasturi doirasida Yaponiyaning O‘zbekistonga grant yordamini taqdim etishini ko‘zda tutadi. Loyiha qiymati 859 million iyena, ya’ni taxminan 5,6 million AQSh dollariga teng.
Mazkur dastur asosida Toshkent shahri va viloyatlardagi 17 ta davlat shifoxonasiga zamonaviy yapon mammografiya uskunalari yetkazib beriladi. Ushbu qurilmalar mamlakatimizda mammografik tekshiruvlarni kengroq amalga oshirish imkonini beradi va ko‘krak bezi saratonini erta aniqlash samaradorligini oshiradi.
Bu esa ayollar salomatligini yaxshilash va ushbu og‘ir kasallikka qarshi kurashni yangi bosqichga olib chiqishga xizmat qiladi. Ta’kidlash joizki, bu kabi tashabbuslarni rivojlantirish masalasi 2022-yil dekabr oyida «Markaziy Osiyo + Yaponiya» tashqi ishlar vazirlari uchrashuvida muhokama qilingan edi.
O‘sha yig‘ilishda Yaponiya hukumati Markaziy Osiyo mamlakatlarida inson kapitalini rivojlantirish va sifatli iqtisodiy o‘sishga investitsiya kiritish niyatini bildirgan edi. Mazkur loyiha aynan shu maqsadlar yo‘lida amalga oshirilmoqda.
