Tadbirkorlar uchun “Biznesni 15 daqiqada boshlash” tizimi joriy etiladi
O‘zbekiston Respublikasi Prezidenti Shavkat Mirziyoyevning farmoniga muvofiq, tadbirkorlarning ma’muriy xarajatlarini 90 milliard so‘mgacha qisqartirish rejalashtirilmoqda. Bu haqda Zamin.uz xabar berdi.
Ushbu maqsadga erishish uchun kelgusi yildan boshlab mamlakatda “Biznesni 15 daqiqada boshlash” tamoyili joriy etiladi. Bu tamoyil tadbirkorlik faoliyatini boshlash jarayonini soddalashtirish va vaqtni tejashga qaratilgan.
Yangi tizim doirasida tadbirkorlar ro‘yxatdan o‘tishda bir qator qulay xizmatlardan foydalanishlari mumkin bo‘ladi. Xususan, ularga elektron raqamli kalit olish, bank hisob raqamlarini ochish uchun ariza topshirish, litsenziyalar rasmiylashtirish imkoniyati taqdim etiladi.
Shuningdek, ijara shartnomalarini rasmiylashtirish, onlayn ro‘yxatdan o‘tish va kassa apparatlarini sotib olish tartibi ham soddalashtiriladi. Ushbu o‘zgarishlar davlat rahbarining farmonida alohida qayd etilgan.
Davlat statistika qo‘mitasi ma’lumotlariga ko‘ra, joriy yil noyabr oyining boshida respublikada 465,9 mingdan ortiq korxona faoliyat yuritmoqda. Ushbu ko‘rsatkich o‘tgan yilga nisbatan 0,7 foizga kamaygan.
Mazkur korxonalarning 395,7 mingdan ortig‘i kichik biznes subyektlariga to‘g‘ri keladi. Hududlar bo‘yicha eng ko‘p faoliyat yuritayotgan korxonalar Toshkent shahrida (23 foiz), Toshkent viloyatida (9,7 foiz) va Samarqand viloyatida (8,6 foiz) joylashgan.
Ushbu yangiliklar tadbirkorlikni rivojlantirish va iqtisodiy faollikni oshirishga xizmat qilishi kutilmoqda.
