Toqayev Mirziyoyevga mehmondo‘stlik uchun minnatdorlik bildirdi
Qozog‘iston Prezidenti Qasim-Jomart Toqayev O‘zbekiston Prezidenti Shavkat Mirziyoyevga tashakkurnoma yo‘lladi. Bu haqda Zamin.uz xabar berdi.
U 14-16-noyabr kunlari O‘zbekistonga amalga oshirgan davlat tashrifi davomida ko‘rsatilgan iliq mehmondo‘stlik uchun o‘z minnatdorchiligini bildirdi. Toqayevning maktubida mazkur tashrif Qozog‘iston va O‘zbekiston o‘rtasidagi strategik sheriklik va ittifoqchilik munosabatlarini yanada mustahkamlashga hissa qo‘shgan tarixiy voqea sifatida baholandi.
U Toshkentda o‘tkazilgan Markaziy Osiyo davlatlari rahbarlarining VII Maslahat uchrashuvini ham yuqori darajada e’tirof etdi. Prezidentning so‘zlariga ko‘ra, mazkur uchrashuvda mintaqaviy hamkorlikning barcha yo‘nalishlari bo‘yicha mazmunli muhokamalar olib borilgan.
Qabul qilingan muhim qarorlar va hujjatlar, shuningdek, Ozarbayjonning to‘laqonli ishtirokchi sifatida qo‘shilishi bu tadbirga strategik ahamiyat bag‘ishlagan. Toqayev bu jarayonlarni mintaqaviy hamkorlikni rivojlantirishda muhim qadam sifatida baholagan.
Ma’lumot manbasi: Zamin.uz.
