O‘zbekiston Prezidenti Shavkat Mirziyoyev Konstitutsiya kuni bayramiga tayyorgarlik ko‘rish va uni mamlakat bo‘ylab keng nishonlash bo‘yicha farmon imzoladi. Bu haqda Zamin.uz xabar berdi.
Ushbu farmon asosida bayram tadbirlari rejasini amalga oshirish uchun mas’ul bo‘lgan tashkiliy qo‘mita tarkibi tasdiqlandi. Bayram tadbirlari yurtimizning barcha hududlarida, jumladan, shaharlarda, tumanlarda va eng kichik aholi punktlarida ham o‘tkaziladi.
Dastur doirasida ochiq muloqotlar, madaniy kechalar, festivallar, olimlar, san’at arboblari va sportchilar bilan uchrashuvlar tashkil etilishi rejalashtirilgan. Shuningdek, tadbirlar davomida O‘zbekiston Konstitutsiyasining iqtisodiyot, ijtimoiy soha, fan, madaniyat, sport va inson huquqlarini himoya qilishdagi ahamiyati keng yoritiladi.
Ta’lim muassasalarida esa bayram oldidan maxsus "Konstitutsiya darslari" o‘tkazilishi ko‘zda tutilgan. Bu darslarda huquqshunoslar va davlat organlari vakillari ishtirok etib, yosh avlodga Konstitutsiyaning mazmun-mohiyatini tushuntiradi.
Bayram tadbirlari uchun mablag‘lar mahalliy byudjetlar, turli idoralar mablag‘lari hamda hukumat va Toshkent shahar hokimligi zaxira jamg‘armalari hisobidan qoplanadi. Ushbu chora-tadbirlar fuqarolarning huquqiy ongini oshirish va Konstitutsiyaning ahamiyatini yanada chuqurroq anglashga xizmat qiladi.
Manba: one.uz.
