O‘zbekistonda mineral o‘g‘itlar raqamli belgilandi
O‘zbekistonda mineral o‘g‘itlar va o‘simliklarni himoya qilish vositalarini raqamli belgilash bo‘yicha Asl Belgisi tizimida tajriba loyihasi muvaffaqiyatli yakunlandi. Bu haqda Zamin.uz xabar berdi.
Loyiha doirasida mamlakatdagi yirik ishlab chiqaruvchilar, jumladan, SWISSAGRO MChJ, IFODA AGRO KIMYO HIMOYA MChJ, INDORAMA KOKAND FERTILIZERS AND CHEMICALS AJ, SCHELKOVO AGROHIM-OZBEKISTAN QK MChJ va MAXAM-CHIRCHIQ AJ bilan hamkorlikda 5,3 milliondan ortiq mahsulot birligi raqamli belgilandi. Tajriba davomida ishlab chiqarish jarayonida DataMatrix kodlari qo‘llanildi.
Ushbu kodlar logistika bosqichlarida mahsulotlarni kuzatish, elektron hisob-fakturalar va onlayn cheklar orqali sotish mexanizmlarini sinovdan o‘tkazishga xizmat qildi. Tizimga 19 kompaniya ixtiyoriy ravishda qo‘shilib, umumiy hisobda 2,5 milliondan ortiq mahsulotni raqamli belgilash jarayonida ishtirok etdi.
Mazkur loyiha O‘zbekiston Respublikasi Qishloq xo‘jaligi vazirligi huzuridagi Karantin va o‘simliklarni himoya qilish agentligi boshchiligida, Soliq qo‘mitasi va Davlat bojxona qo‘mitasi ko‘magida amalga oshirildi. Bu tizim mahsulot aylanmasining barcha bosqichlarida nazoratni kuchaytirib, monitoring jarayonlarini muvofiqlashtirishga imkon berdi.
Raqamli belgilash tizimi sohaga qator afzalliklarni olib keldi. Jumladan, mahsulot sifatini nazorat qilish, sohada shaffoflikni ta’minlash va noqonuniy aylanmani kamaytirishga zamin yaratildi.
Loyiha natijalari asosida 2026-yil 1-maydan boshlab o‘g‘itlar va o‘simliklarni himoya qilish vositalarini majburiy raqamli belgilash tizimiga bosqichma-bosqich o‘tish rejalashtirilmoqda. Bu esa qishloq xo‘jaligi mahsulotlarining sifatini yanada oshirishga xizmat qiladi.
