Toshkentda havoni ifloslantiruvchi korxonalar ko‘chiriladi
O‘zbekiston Prezidenti Shavkat Mirziyoyevning qaroriga ko‘ra, Toshkent shahridagi havoni ifloslantirayotgan korxonalar sanoat zonalariga ko‘chiriladi. Bu haqda Zamin.uz xabar berdi.
Ushbu chora-tadbirlar shahar ekologik holatini yaxshilash maqsadida amalga oshirilmoqda. Ayniqsa, kechki va tungi vaqtlarda faoliyat olib borayotgan sanoat obyektlariga qo‘yiladigan talablar yanada kuchaytiriladi.
Shuningdek, korxonalarga ekologik ruxsatnomalar va litsenziyalar berish tartibini qayta ko‘rib chiqish rejalashtirilgan. Ekologik me’yorlarga javob bermaydigan transport vositalaridan foydalanishni taqiqlash va kimyoviy moddalar hamda yoqilg‘idan foydalanish ustidan qat’iy nazorat o‘rnatish ham ko‘zda tutilgan.
Shaharning ekologiyasiga salbiy ta’sir ko‘rsatadigan obyektlarni aniqlash uchun maxsus komissiya tashkil etiladi. Uch kun ichida zavodlar, qurilish maydonchalari va transport vositalari atroflicha tekshiriladi.
Havo ifloslanishiga sabab bo‘layotgan korxonalar belgilanganidan so‘ng, ularga ekologik talablarga mos keladigan aniq chora-tadbirlar qo‘llaniladi. Bundan tashqari, qurilish maydonlarida changni kamaytirish va havo tozaligini ta’minlash maqsadida maxsus sug‘orish va tozalash tizimlarini o‘rnatish majburiy bo‘ladi.
Ekologik talablarga rioya qilmagan korxonalarning faoliyatini vaqtincha cheklash yoki to‘xtatish bo‘yicha takliflar tayyorlanadi. Mazkur chora-tadbirlar orqali Toshkent shahrining ekologik muammolarini bartaraf etish va aholiga qulay yashash sharoitlarini yaratish maqsad qilingan.
