Uzum platformasiga 300 milliard so‘m sarmoya kiritildi
O‘zbekiston iqtisodiyotining raqamli rivojlanishiga yana bir yirik sarmoya jalb qilindi. Bu haqda Zamin.uz xabar berdi.
Dunyoning yetakchi xalqaro investorlaridan biri hisoblangan VR Capital kompaniyasi tomonidan Uzum platformasiga 300 milliard so‘m miqdorida mablag‘ kiritildi. Ushbu mablag‘ platformaning raqamli bank xizmatlari va to‘lov infratuzilmasini rivojlantirishga yo‘naltiriladi.
Mazkur kelishuv VR Capital va Uzum o‘rtasidagi ikkinchi hamkorlik bitimi hisoblanadi. Eslatib o‘tish joizki, 2025-yilda VR Capital Uzum’ning asosiy sarmoyadorlaridan biriga aylangan edi.
Bu holat investorlarning O‘zbekistonning raqamli iqtisodiyoti istiqboliga bo‘lgan ishonchini yana bir bor tasdiqlaydi. Yangi jalb qilingan mablag‘ Uzum platformasining fintex yo‘nalishlarini, jumladan, raqamli banking, to‘lov tizimlari va iste’mol kreditlash xizmatlarini yanada rivojlantirishga yordam beradi.
Shuningdek, bu bitim O‘zbekiston va AQSH o‘rtasidagi iqtisodiy hamkorlikning mustahkamlanib borayotganining yorqin ko‘rinishidir. Uzum asoschisi Jasur Jo‘mayev bu moliyalashtirish nafaqat kompaniyaning, balki mamlakat iqtisodiyotining raqamli rivojlanish sur’atlarini ham oshirishini ta’kidladi.
Eng muhimi, sarmoya milliy valyutada ajratilgan bo‘lib, bu so‘mning xalqaro moliyaviy operatsiyalardagi mavqeining yuksalib borayotganini ko‘rsatadi. VR Capital Group prezidenti Richard Deyts Uzum’ning o‘sish sur’atlarini yuqori baholab, platformaning raqamli transformatsiyaga qo‘shayotgan hissasini qo‘llab-quvvatlashini bildirdi.
Bugungi kunda Uzum o‘z ekotizimida onlayn savdo, raqamli va an’anaviy banking, shuningdek, fintex xizmatlarini birlashtirgan holda mamlakatning eng yirik raqamli platformasiga aylangan. Mazkur platformadan 20 milliondan ortiq O‘zbekiston aholisi faol foydalanmoqda.
Manba: Zamin.uz
