O‘zbekiston Prezidenti Shavkat Mirziyoyev tadbirkorlar uchun yangi imkoniyatlar yaratish maqsadida «Biznes hamroh» markazlarini tashkil etishni tasdiqladi. Bu haqda Zamin.uz xabar berdi.
Ushbu markazlar «yagona darcha» tamoyili asosida ishlaydi va tadbirkorlik faoliyatini qo‘llab-quvvatlash uchun davlat va xususiy xizmatlarni bir joyda taqdim etadi. Bu xizmatlar biznesni ro‘yxatdan o‘tkazishdan tortib, eksportga ko‘maklashishgacha bo‘lgan jarayonlarni qamrab oladi.
Mazkur markazlar Savdo-sanoat palatasi huzurida tashkil etilishi rejalashtirilgan. Tadbirkorlar bu yerda buxgalteriya, soliq masalalari, sertifikatlash va eksport bo‘yicha maslahatlar olishlari mumkin.
Shuningdek, ularga bank, sug‘urta kompaniyalari, brokerlik va logistika xizmatlari ham taqdim etiladi. Tadbirkorlar uchun yanada qulaylik yaratish maqsadida yagona elektron platforma va 24 soat ishlaydigan call-markaz ishga tushiriladi.
Prezident taqdimot davomida eksport hajmini oshirish rejalari haqida ham to‘xtalib o‘tdi. O‘zbekiston 2030 yilga borib eksport hajmini 45 milliard dollarga yetkazishni maqsad qilgan.
Tahlillar shuni ko‘rsatadiki, mamlakat qurilish materiallari, to‘qimachilik, elektrotexnika, oziq-ovqat mahsulotlari, maishiy kimyo, mashinasozlik va metallurgiya sohalarida eksportni sezilarli darajada oshirish imkoniyatiga ega. Manba: one.uz
