2024 yilda muammoli kreditlar 10 foizga yetishi mumkin

Fitch reyting agentligi tomonidan taqdim etilgan prognozlarga ko‘ra, 2024 yilda O‘zbekiston banklaridagi muammoli kreditlar hajmi umumiy kreditlar miqdorining 9-10 foiziga yetishi mumkin. Bu haqda Zamin.uz xabar berdi.

Mutaxassislar bu holatni davlat banklari faoliyatidagi xavflarning tan olinishi davom etayotgani bilan izohlamoqda. Shuningdek, kreditlash jarayonidagi kechikishlar sababli chakana kredit portfellarining qadrsizlanishi ham ortishi kutilmoqda.

Markaziy bank hisob-kitoblariga ko‘ra, joriy yilning dastlabki o‘n oyida muammoli kreditlar hajmi 22,4 trillion so‘mni tashkil qilgan. Ushbu davrda oylik o‘sish sur’ati 5,1 foizni tashkil etgan.

Mazkur ko‘rsatkichning katta qismi davlat ulushi mavjud moliyaviy tashkilotlarga to‘g‘ri kelib, ularning hissasi 15,8 trillion so‘mni tashkil etmoqda. Xususiy banklarda esa muammoli kreditlar hajmi 6,6 trillion so‘mga yetgan.

Shunga qaramay, Fitch agentligi 2024 yilda O‘zbekiston bank sektorining barqarorligini saqlab qolishini taxmin qilmoqda. Tahlilchilarning fikricha, Toshkent banklarni xususiylashtirish bo‘yicha yanada maqsadli va samarali dasturlarni joriy etishni rejalashtiradi.

Manba: Zamin.uz.