O‘zbekiston Respublikasi Prezidenti Shavkat Mirziyoyev 3-dekabr kuni kimyo sanoatini rivojlantirish bo‘yicha amalga oshirilayotgan ishlar va kelgusidagi rejalarga bag‘ishlangan yig‘ilish o‘tkazdi. Bu haqda Zamin.uz xabar berdi.
Unda kimyo sanoatida ishlab chiqarishni oshirish, tannarxni pasaytirish va eksport hajmini ko‘paytirish masalalari muhokama qilindi. Prezidentning ta’kidlashicha, 2030-yilgacha kimyo sanoati ishlab chiqarish quvvatlarini ikki barobarga oshirish, mineral o‘g‘itlar ishlab chiqarishni 1,5 barobarga ko‘paytirish va eksport hajmini 1 milliard dollarga yetkazish rejalashtirilgan.
Hozirda tarmoqda umumiy qiymati 1 milliard dollarga teng bo‘lgan 21 ta yirik loyiha amalga oshirilmoqda. Kelgusi uch yil ichida esa yana 4,5 milliard dollarlik yangi loyihalarni ishga tushirish ko‘zda tutilgan.
Yig‘ilishda energiya tejaydigan texnologiyalarni joriy etish va raqamlashtirishning ahamiyati alohida ta’kidlandi. Azotli o‘g‘itlar tannarxining 55 foizi energiya xarajatlariga to‘g‘ri kelishi sababli, bu xarajatlarni optimallashtirish uchun samarali choralar ko‘rilishi belgilandi.
Shuningdek, mahalliy xom ashyoni chuqur qayta ishlash, yangi mahsulotlar ishlab chiqarish va eksport hajmini ikki barobarga oshirish masalalari muhim vazifa sifatida belgilandi. Toshkent, Navoiy va Jizzax viloyatlarida yuqori qo‘shilgan qiymatga ega mahsulotlar – "yashil" mineral o‘g‘itlar, kaliy ksantogenat va kaliy sulfati kabi mahsulotlar ishlab chiqarish yo‘lga qo‘yildi.
2025-yilda 4,5 million tonna paxta yetishtirish maqsad qilingan. Bu maqsadga erishish uchun fosforli o‘g‘itlar zaxirasini shakllantirish, fermerlarga sulfat kislotasini yetkazib berish va imtiyozli kreditlar ajratish ishlari jadallashtiriladi.
Prezident kimyo sanoatini mamlakat iqtisodiyotining strategik tarmog‘i sifatida e’tirof etdi. Ichki bozorni barqaror ta’minlash, eksport salohiyatini oshirish va yangi ish o‘rinlarini yaratish bo‘yicha aniq vazifalar belgilandi.
