Yandex Go O‘zbekiston bo‘ylab yuk yetkazishni yo‘lga qo‘ydi
Yandex Go xizmatida yangi funksiyalar ishga tushirildi. Bu haqda Zamin.uz xabar berdi.
Endilikda O‘zbekiston shaharlariga yuklarni yetkazib berish xizmati yo‘lga qo‘yildi. Ushbu xizmat orqali foydalanuvchilar posilkalarni Yandex Go Market qabul qilish punktlaridan jo‘natib, boshqa shahardagi qabul qilish punktidan olishlari mumkin.
Yetkazib berish jarayoni bir kun ichida amalga oshiriladi. Bu xizmat nafaqat shaxsiy jo‘natmalar uchun, balki kichik biznes uchun ham qulay bo‘lib, mijozlarga buyurtmalarni tezroq yetkazish imkonini beradi.
Buyurtma berish jarayoni oddiy: ilovadagi “Yetkazib berish” bo‘limidan “O‘zbekiston bo‘ylab” xizmatini tanlash, jo‘natuvchi va qabul qiluvchi ma’lumotlarini kiritish, jo‘natish va qabul qilish punktlarini tanlash hamda posilka turini (S – 2 kg gacha, M – 5 kg gacha yoki L – 12 kg gacha) belgilash kifoya. Shundan so‘ng posilkani qabul qilish punktiga olib borish lozim, qabul qiluvchi esa ilova orqali xabarnoma olganidan keyin uni olib ketadi.
Hozirda xizmat Toshkent, Samarqand, Buxoro va Farg‘ona shaharlarini qamrab olgan. Kelgusida xizmat ko‘rsatish hududlari kengaytirilishi rejalashtirilgan.
Posilka holatini ilova orqali kuzatish mumkin. Dastlabki uchta jo‘natma narxi 4500 so‘mni tashkil etadi, keyingi jo‘natmalar esa 9500 so‘m turadi.
Narx shaharga bog‘liq emas va belgilangan. To‘lov ilova orqali amalga oshiriladi, kelgusida esa boshqa to‘lov usullari ham joriy etilishi ko‘zda tutilgan.
