O‘zbekiston Prezidenti Shavkat Mirziyoyev Konstitutsiya kuni munosabati bilan o‘tkazilgan tadbirda kelgusida amalga oshiriladigan muhim rejalar haqida ma’lumot berdi. Bu haqda Zamin.uz xabar berdi.
U o‘z nutqida hokimlar va mahalliy kengashlar rahbarlarining vakolatlarini ajratish masalasi ustida to‘xtaldi. Ushbu o‘zgarishlar 2026 yilning 1 yanvaridan boshlab amalga oshirilishi rejalashtirilgan.
Davlat rahbarining ta’kidlashicha, bu chora Konstitutsiyaviy tamoyillarni hayotga tatbiq etish, xususan, xalq davlat hokimiyatining yagona manbai ekanligini amalda ta’minlashga xizmat qiladi. Prezidentning nutqida bu islohotlar vakillik demokratiyasini mustahkamlash va qonun ustuvorligini ta’minlash yo‘lidagi muhim qadam sifatida baholandi.
Shu bilan birga, mahalliy kengashlarning faoliyati haqida ham ma’lumot berildi. O‘tgan davrda ular tomonidan 25 mingdan ortiq masalalar ko‘rib chiqilib, mansabdor shaxslarga qariyb 14 ming deputatlik so‘rovlari yuborilgani qayd etildi.
Shavkat Mirziyoyev ijtimoiy va gumanitar sohalarda erishilgan yutuqlarni ham tilga oldi. Xususan, kambag‘allik darajasining 6,6 foizgacha kamaygani va 1 milliondan ortiq fuqaroning qashshoqlikdan chiqqani e’tirof etildi.
Prezident olib borilayotgan islohotlarning asosiy maqsadi inson qadr-qimmatini himoya qilish ekanligini alohida ta’kidladi. Shuningdek, davlat rahbari O‘zbekistondagi islohotlarning xalqaro e’tirofga sazovor bo‘layotgani, mamlakatning Barqaror rivojlanish maqsadlari indeksidagi o‘rni yaxshilangani va suveren kredit reytinglari oshgani haqida gapirdi.
Samarqandda YUNESKO Bosh konferensiyasining o‘tkazilgani ham mamlakatning xalqaro miqyosdagi muvaffaqiyatlaridan biri sifatida qayd etildi. Prezident nutq so‘ngida Konstitutsiyaning har bir normasini davlat organlari faoliyati uchun amaliy yo‘riqnoma sifatida qabul qilish va yoshlarni konstitutsiyaviy qadriyatlar asosida tarbiyalash muhim vazifalardan biri ekanini ta’kidladi.
