2026-yildan yirik xaridlar faqat bank orqali amalga oshiriladi
O‘zbekistonda 2026-yil 1-apreldan boshlab iqtisodiy shaffoflikni oshirish va naqd pul aylanmasini kamaytirishga qaratilgan yangi moliyaviy tartiblar joriy etiladi. Bu haqda Zamin.uz xabar berdi.
Ushbu o‘zgarishlar Prezident farmoni asosida amalga oshiriladi. Yangi qoidalarga ko‘ra, ayrim tovar va xizmatlar uchun to‘lovlar faqat bank kartalari yoki elektron to‘lov tizimlari orqali amalga oshirilishi shart qilib belgilangan.
Mazkur tartibga muvofiq, davlat xizmatlari uchun to‘lovlar, kommunal xizmatlar (elektr, gaz, suv), alkogol va tamaki mahsulotlari savdosi, avtomobil yoqilg‘isi va elektrotransportlar uchun quvvatlash xizmatlari uchun naqd puldan foydalanish taqiqlanadi. Shuningdek, qiymati 25 million so‘mdan yuqori bo‘lgan barcha tovar va xizmatlar, ko‘chmas mulk oldi-sotdisi, ishlab chiqarilganiga 10 yildan oshmagan avtomobillar va maxsus texnika savdosida ham faqat bank orqali hisob-kitob qilish talab etiladi.
Bu o‘zgarishlar natijasida 2026-yildan boshlab uy, avtomobil yoki boshqa katta qiymatdagi aktivlarni naqd pulga xarid qilish imkoniyati bo‘lmaydi. Barcha yirik moliyaviy bitimlar faqat bank tizimi orqali rasmiylashtiriladi.
Ushbu chora-tadbirlar iqtisodiyotni yanada shaffof qilish va moliyaviy tartib-intizomni mustahkamlash maqsadida joriy etilmoqda. Manba: Zamin.uz
