O‘zbekiston Prezidenti Shavkat Mirziyoyev agrar soha vakillari bilan uchrashuvda Xitoydan 50 ta agrodron olib kelinishi rejalashtirilayotganini ma’lum qildi. Bu haqda Zamin.uz xabar berdi.
Ushbu dronlar fermerlarga xizmat ko‘rsatish uchun mamlakatning barcha hududlarida kamida ikki mobil dron kompleksi sifatida tashkil etiladi. Davlat rahbari, shuningdek, dronlarning yuk ko‘tarish hajmi 100 kilogrammdan 250 kilogrammgacha oshirilishini ta’kidladi.
Prezidentning so‘zlariga ko‘ra, fermerlar va klasterlar soni ortib, ularning faoliyatida raqamli texnologiyalar va sun’iy intellektni qo‘llash yo‘lga qo‘yilmoqda. Bu esa yuqori hosildorlikka erishishga zamin yaratmoqda.
Shavkat Mirziyoyevning aytishicha, O‘zbekistonda yer uchastkalari va ekinlar monitoringi yuzlab dronlar yordamida amalga oshirilmoqda. Bundan tashqari, Qishloq xo‘jaligi vazirligi huzurida maxsus dronlar markazi tashkil etilgan.
Xitoyning DJI kompaniyasi 2025-yil noyabr oyiga qadar dunyo bo‘ylab 200 mingdan ortiq agrodron yetkazib bergan. Ushbu dronlar o‘simliklarni sug‘orish va himoya qilish, shuningdek, chorvachilik hamda baliqchilikda ham keng qo‘llanmoqda.
(Manba: DK News)
