O‘zbekistonda 100 yoshdan oshgan 461 nafar fuqaro bor
2025 yil 1 dekabr holatiga ko‘ra, O‘zbekistonda 100 yoshdan oshgan va pensiya olayotgan fuqarolar soni 461 nafarni tashkil etadi. Bu haqda Zamin.uz xabar berdi.
Bu ma’lumot Pensiya jamg‘armasi tomonidan e’lon qilingan. Mazkur fuqarolarning 131 nafari erkaklar, 330 nafari esa ayollardan iborat.
Statistik ma’lumotlarga ko‘ra, 100 yoshdan oshgan fuqarolar eng ko‘p Qashqadaryo viloyatida (73 nafar), Surxondaryo viloyatida (69 nafar) va Toshkent viloyatida (41 nafar) istiqomat qiladi. Eng kam ko‘rsatkich esa Namangan viloyatida qayd etilgan bo‘lib, bu hududda 100 yoshdan oshgan atigi 11 nafar fuqaro yashamoqda.
Mas’ullar ta’kidlashicha, yuqori yoshdagi pensiya oluvchilarning ijtimoiy himoyasi va salomatligi doimiy nazoratda bo‘lib, ularga zarur yordam ko‘rsatilmoqda. Bu fuqarolarning hayot sifatini yaxshilash va ularni har tomonlama qo‘llab-quvvatlash ustuvor vazifa sifatida belgilangan.
Ma’lumot manbasi: Pensiya jamg‘armasi.
