Saida Mirziyoyeva Rimdagi xalqaro mukofot hay’atida ishtirok etdi
11–12-dekabr kunlari Italiya poytaxti Rim shahrida Shayx Zoid nomidagi "Insoniy birodarlik" xalqaro mukofoti hay’atining yakuniy yig‘ilishi bo‘lib o‘tdi. Bu haqda Zamin.uz xabar berdi.
Mazkur nufuzli tadbirda O‘zbekiston Respublikasi Prezidenti Administratsiyasi rahbari Saida Mirziyoyeva ham ishtirok etdi. Saida Mirziyoyeva ushbu yig‘ilish haqida o‘zining ijtimoiy tarmoqlardagi sahifasida taassurotlarini o‘rtoqlashar ekan, nomzodlarni har tomonlama o‘rganish va ularning inson qadrini yuksaltirish borasidagi xizmatlarini baholash jarayoni muhim bosqich bo‘lganini ta’kidladi.
Uning so‘zlariga ko‘ra, bu yilgi tanlovda ishtirok etgan shaxslar va tashkilotlar o‘z hamjamiyatlariga sezilarli ijobiy ta’sir ko‘rsatgan nomzodlar sifatida e’tirof etildi. Saida Mirziyoyeva hay’at a’zolari bilan birgalikda mukofot sovrindorlarini saralash jarayonida ishtirok etganidan mamnun ekanligini bildirdi.
U jamoaviy qabul qilingan qarorlar o‘zaro anglashuv va konstruktiv muloqotni rivojlantirishga hissa qo‘shishiga ishonch bildirdi. Shayx Zoid nomidagi "Insoniy birodarlik" xalqaro mukofoti 2019 yilda Birlashgan Arab Amirliklari asoschisi Shayx Zoid bin Sulton Ol Nahayon sharafiga ta’sis etilgan.
Ushbu mukofot insonlar o‘rtasidagi birodarlikni mustahkamlash, bag‘rikenglik, tinchlik va madaniyatlararo muloqotni rivojlantirishda xizmat qilgan shaxslar va tashkilotlarni taqdirlashga qaratilgan. Mukofot har yili 4-fevral kuni – Xalqaro inson birodarligi kunida tantanali ravishda topshiriladi.
Laureatlarga 1 million AQSH dollari miqdorida pul mukofoti berilishi ham belgilangan. Bu yuksak mukofot insonparvarlik qadriyatlarini targ‘ib qilishda muhim ahamiyatga ega.
