Toshkentda xalqaro suv haftaligi o‘tkaziladi
Kelgusi yilning mart oyida Toshkent shahrida xalqaro suv haftaligi o‘tkazilishi rejalashtirilgan. Bu haqda Zamin.uz xabar berdi.
Ushbu tadbirda mintaqa davlatlari va xalqaro tashkilotlar vakillari ishtirok etadi. Forum davomida suv resurslaridan oqilona foydalanish, zamonaviy “yashil” texnologiyalarni joriy etish masalalari muhokama qilinadi.
15-dekabr kuni mazkur tadbir haqida Prezident Shavkat Mirziyoyevga ma’lumot berildi. Davlat rahbari xalqaro suv haftaligini yuqori saviyada tashkil etish va Qoraqalpog‘iston hududida suvni tejash texnologiyalari bo‘yicha xalqaro forumga puxta tayyorgarlik ko‘rishni topshirdi.
Shu bilan birga, suv xo‘jaligida energiya iste’molini kamaytirish choralari muhokama qilindi. Qoraqalpog‘iston hududida 274 ta nasos stansiyasi mavjud bo‘lib, ular orqali 185 ming gektardan ortiq yer sug‘oriladi.
Ammo nasoslarning aksariyati eskirgan bo‘lib, ular zamonaviy nasoslarga qaraganda 2-3 barobar ko‘proq elektr energiyasi sarflaydi. Kegayli tumanida bitta nasos yangisiga almashtirilgach, elektr energiyasi iste’moli ikki barobar kamaygani qayd etildi.
Endilikda mamlakat bo‘ylab 276 ta nasosni energiya tejamkorlariga almashtirish rejalashtirilmoqda. Bu loyiha natijasida yillik 25 milliard so‘m mablag‘ni tejash imkoniyati yaratiladi va loyiha 14 oy ichida o‘zini oqlashi kutilmoqda.
Shuningdek, rasmiylar mahalliy ishlab chiqaruvchilarni qo‘llab-quvvatlashning ahamiyatiga alohida urg‘u berdilar. Toshkent irrigatsiya instituti faoliyati bo‘yicha ham ma’lumot taqdim etildi.
Hozirda mazkur institutda 8 682 nafar talaba tahsil olmoqda, 571 nafar o‘qituvchi faoliyat yuritmoqda. Institut THE World University Rankings 2026 ro‘yxatida O‘zbekistonda birinchi o‘rinni egallab, dunyoning eng yaxshi 500 ta universiteti qatoridan joy olgan.
Kelgusida institutda iqlim o‘zgarishlarini o‘rganish uchun raqamli platforma yaratish, sun’iy yo‘ldosh ma’lumotlari bilan ishlashni rivojlantirish va xalqaro maqomga ega “Suv diplomatiyasi” magistratura dasturini tashkil etish rejalashtirilmoqda.
