O‘zbekiston Prezidenti Shavkat Mirziyoyev 18–20 dekabr kunlari Yaponiya bosh vaziri Sanae Takaichining taklifiga binoan ushbu mamlakatga rasmiy tashrif buyuradi. Bu haqda Zamin.uz xabar berdi.
Tashrif davomida davlat rahbari «Markaziy Osiyo + Yaponiya» muloqoti doirasida o‘tkaziladigan birinchi sammitda ishtirok etishi rejalashtirilgan. Ushbu tashrif O‘zbekiston va Yaponiya o‘rtasidagi strategik sheriklik munosabatlarini yangi bosqichga olib chiqishi kutilmoqda.
Prezidentning safari doirasida Tokio shahrida Yaponiya imperatori Naruxito, bosh vazir Sanae Takaichi, parlament rahbariyati, hukumat vakillari, siyosiy partiyalar yetakchilari hamda nufuzli universitetlarning rektorlari bilan uchrashuvlar o‘tkazilishi mo‘ljallangan. Ushbu muloqotlarda ikki davlat o‘rtasidagi ishonchli hamkorlikni yanada mustahkamlash masalalari muhokama qilinadi.
Tashrif kun tartibidan O‘zbekiston va Yaponiya o‘rtasidagi strategik sheriklikni chuqurlashtirish, ko‘p qirrali hamkorlikni rivojlantirish va uzoq muddatli qo‘shma loyihalarni amalga oshirish masalalari o‘rin olgan. Siyosiy, iqtisodiy, ilmiy va madaniy aloqalarni yanada boyitish imkoniyatlari ko‘rib chiqilishi rejalashtirilgan.
Shuningdek, Prezident Shavkat Mirziyoyev Yaponiyaning yirik kompaniyalari va moliya institutlari rahbarlari bilan uchrashuvlar o‘tkazadi. Bu uchrashuvlarda savdo-iqtisodiy hamkorlikni kengaytirish, investitsiya loyihalarini ilgari surish va qo‘shma tashabbuslarni amalga oshirish masalalari muhokama qilinadi.
Safar yakunida ikki tomonlama hamkorlikni mustahkamlovchi qator hujjatlar imzolanishi kutilmoqda. «Markaziy Osiyo + Yaponiya» sammitida esa «yashil iqtisodiyot»ni rivojlantirish, barqaror taraqqiyot, transport va logistika aloqalarini mustahkamlash, mintaqaviy hamkorlikni rivojlantirish hamda inson kapitali salohiyatini oshirish kabi masalalar muhokama qilinadi.
Sammit yakunida Tokio deklaratsiyasi qabul qilinishi va bu hujjat Markaziy Osiyo davlatlari bilan Yaponiya o‘rtasidagi hamkorlikni yangi bosqichga olib chiqishi kutilmoqda.
