Mirziyoyev YEOIIda savdo to‘siqlarini bartaraf etishni taklif qildi
O‘zbekiston Prezidenti Shavkat Mirziyoyev Oliy Yevroosiyo iqtisodiy kengashi yig‘ilishida savdo to‘siqlarini bosqichma-bosqich bartaraf etish va tartiblarni soddalashtirish bo‘yicha "yo‘l xaritasi" ishlab chiqishni taklif etdi. Bu haqda Zamin.uz xabar berdi.
U texnik tartibga solish, sertifikatlash va bojxona boshqaruvi sohalaridagi farqlarni bartaraf etish uchun "O‘zbekiston–YEOII" qo‘shma muvofiqlashtiruvchi guruhini tashkil etishni taklif qildi. Shuningdek, davlat rahbari mashinasozlik, energetika, qishloq xo‘jaligi, kimyo va boshqa sohalarda umumiy loyiha ro‘yxatini shakllantirishni taklif qildi.
U infratuzilma va "yashil" loyihalar, shuningdek, kichik va o‘rta biznesni qo‘llab-quvvatlash bo‘yicha Yevroosiyo taraqqiyot banki doirasida reja ishlab chiqish zarurligini ta’kidladi. Mirziyoyev raqamli platformalarni integratsiya qilish, jumladan, elektron savdo va raqamli markirovka yo‘nalishlarini rivojlantirish bo‘yicha "yo‘l xaritasi"ni ishlab chiqishni ham taklif qildi.
Toshkent YEOIIning biotibbiyot, energetika va robototexnika sohalaridagi loyihalariga qiziqish bildirmoqda. Bundan tashqari, O‘zbekiston turizm sohasida umumiy axborot resursini yaratishda hamkorlik qilishga tayyorligini ma’lum qildi.
Ma’lumot: zamin.uz.
