Shahrisabzda suv tanqisligiga qarshi sun’iy muzliklar qurildi
Qashqadaryo viloyati Shahrisabz tumanining Sarchashma mahallasida suv tanqisligini kamaytirish maqsadida yangi texnologik yechim joriy qilindi. Bu haqda Zamin.uz xabar berdi.
Bu hududda sun’iy muzliklar barpo etilib, ular orqali suvni tejash va undan samarali foydalanish yo‘lga qo‘yildi. Tuman hokimligi axborot xizmatiga ko‘ra, ushbu loyiha qish mavsumida suvni muz shaklida yig‘ib, bahor va yoz oylarida uni asta-sekin eritish orqali sug‘orish va xo‘jalik ehtiyojlari uchun ishlatishni ko‘zda tutadi.
Loyihaning moliyalashtirilishi FAOning O‘zbekistondagi vakolatxonasi, Ekologiya va iqlim o‘zgarishi milliy qo‘mitasi hamda Qishloq xo‘jaligi vazirligi hamkorligida amalga oshirilgan. Bu loyiha «O‘zbekistonda oziq-ovqat tizimlarining yerdan foydalanish va yerlarni tiklashga ta’sirini baholash» dasturi doirasida tashkil etilgan.
Hozirgi kunda Sarchashma mahallasida to‘rtta sun’iy muzlik ustuni qurilgan. Har bir ustun qish mavsumida 450 kub metrgacha suvni jamlash imkoniyatiga ega.
Bu suv zaxirasi bahor va yoz oylarida mahalliy aholining sug‘orish hamda boshqa ehtiyojlarini qondirishga xizmat qiladi. Mazkur texnologiya qo‘shimcha energiya sarflamaydi, ekologik jihatdan xavfsiz va hududning tabiiy sharoitlariga mos keladi.
Kelgusida bu tajribani mamlakatning boshqa tog‘li hududlarida ham tatbiq etish rejalashtirilmoqda.
