Rossiyadan 14 nafar bola O‘zbekistonga qaytarildi

Rossiya hududida ota-ona qaramog‘isiz qolgan 14 nafar voyaga yetmagan bola O‘zbekistonga qaytarildi. Bu haqda Zamin.uz xabar berdi.

Ushbu jarayon Ichki ishlar vazirligi, Sog‘liqni saqlash vazirligi va Prezident huzuridagi Milliy ijtimoiy himoya agentligi hamkorligida amalga oshirildi. Bolalar Toshkentdagi Islom Karimov nomidagi xalqaro aeroport orqali mamlakatga olib kelingan.

Ular vaqtincha Toshkent shahar Ichki ishlar bosh boshqarmasi huzuridagi Voyaga yetmaganlarga ijtimoiy-huquqiy yordam ko‘rsatish markaziga joylashtirildi. Kerakli rasmiy tartib-taomillar bajarilgach, 13 nafar bola ota-onalariga topshirildi.

Qolgan bir nafar bola esa markaz xodimlari kuzatuvi ostida Andijon shahriga yuborilib, onasiga yetkazib berildi. Bolalarning ijtimoiy qo‘llab-quvvatlanishi davom ettiriladi.

Ushbu jarayon ularning yashash joyidagi “Inson” ijtimoiy xizmatlar markazlari tomonidan amalga oshiriladi.