Voyaga yetmaganga zo‘ravonlik qilgan shaxsga 10 yil jazo berildi
Andijon viloyatida sodir bo‘lgan jinoyat ishi bo‘yicha sud hukmi e’lon qilindi. Bu haqda Zamin.uz xabar berdi.
Ma’lumotlarga ko‘ra, 39 yoshli erkak mahalladoshining uyiga noqonuniy ravishda kirib, voyaga yetmagan bolaga zo‘rlik ishlatgan holda xonadon hovlisidan 7 dona jo‘jani bosqinchilik yo‘li bilan olib ketgan. Ushbu jinoyat 2025 yil 3 may kuni soat 13:30 larda Andijon viloyatining Baliqchi tumanida sodir bo‘lgan.
Hujjatlarda qayd etilishicha, ayblanuvchi xonadon egasining voyaga yetmagan o‘g‘liga jismoniy zo‘ravonlik qilgan, uni urib, bo‘g‘ib og‘ir tan jarohati yetkazgan. Shundan so‘ng, hovlidagi katakdan jo‘jalarni o‘g‘irlagan va voqea joyidan qochib ketgan.
Ma’lum bo‘lishicha, ushbu shaxs avval ham turli jinoyatlar uchun 7 marta sudlangan va jazolarni o‘tab chiqqan. Jinoyat ishlari bo‘yicha Oltinko‘l tuman sudi tomonidan 2025 yil 11 noyabr kuni chiqarilgan hukmga ko‘ra, ayblanuvchi Jinoyat kodeksining 164-moddasi 3-qismi “a, v, g” bandlari bo‘yicha aybli deb topilgan.
Unga 10 yil 2 oy muddatga ozodlikdan mahrum qilish jazosi tayinlangan. Shuningdek, ayblanuvchi “o‘ta xavfli retsidivist” deb topilib, jazoni maxsus tartibli koloniyada o‘tashi belgilangan.
Sud jarayonida ayblanuvchi o‘z aybini tan olgan, ammo “o‘ta xavfli retsidivist” degan bahoga nisbatan norozilik bildirib, apellyatsiya shikoyati kiritgan. 2026 yil 28 yanvar kuni Andijon viloyati sudida ish qayta ko‘rib chiqildi.
Apellyatsiya instansiyasi tomonidan dastlabki sud tomonidan 164-moddaning 3-qismi “a” bandi noto‘g‘ri qo‘llanilgani aniqlangan. Chunki ayblanuvchi ilgari aynan ushbu modda yoki unga o‘xshash jinoyat uchun sudlanmagan.
Shu sababli “takroriylik” belgisi chiqarib tashlangan. Shunga qaramay, sud jazo turini va muddatini adolatli deb topdi.
Hukm o‘zgarishsiz qoldirilib, 10 yil 2 oy ozodlikdan mahrum qilish jazosi kuchda qoldirildi. Apellyatsiya shikoyati esa qisman qanoatlantirildi.
