Ramazonda ehtiyojmandlarga 1 trillion so‘m ajratiladi
Ramazon oyida aholining ijtimoiy himoyasini kuchaytirish maqsadida o‘tkazilgan yig‘ilishda Prezident Shavkat Mirziyoyev ehtiyojmand fuqarolarni qo‘llab-quvvatlash bo‘yicha muhim qarorlar qabul qilinganini ma’lum qildi. Bu haqda Zamin.uz xabar berdi.
Ushbu qarorlar doirasida ehtiyojmand oilalarga yordam ko‘rsatish uchun katta miqdorda mablag‘ ajratilishi rejalashtirilgan. Xususan, «Vaqf» xayriya jamoat fondi orqali 750 milliard so‘m, Ijtimoiy himoya milliy agentligi orqali esa 300 milliard so‘m ajratilishi belgilangan.
Ushbu mablag‘lar yordamida muhtoj oilalarga bir martalik moddiy yordam berish, shuningdek, nogironligi bo‘lgan shaxslarning davolanishi va jarrohlik amaliyotlari xarajatlarini qoplash ko‘zda tutilgan. Davlat rahbari Ramazon oyida nuroniylar, yolg‘iz yashovchilar va og‘ir ahvoldagi fuqarolarga yordam ko‘rsatish an’anaviy ezgu ish ekanini ta’kidladi.
Shu bilan birga, “Ramazon — mehr-muruvvat, ahillik va shukronalik oyi” shiori ostida keng ko‘lamli chora-tadbirlar amalga oshirilishi belgilandi. Yig‘ilish davomida ehtiyojmand oilalarning har bir mahallada aniq va shaffof ro‘yxatini tuzish, yordamlarni dini, millati va ijtimoiy kelib chiqishidan qat’i nazar, adolatli tarzda yetkazish muhimligi qayd etildi.
Shu bilan birga, mas’ul idoralarga ushbu jarayon ustidan qat’iy nazorat o‘rnatish vazifasi yuklatildi.
