Qonunchilikda jamoat tartibini mustahkamlashga yangi qoidalar kiritildi
Oliy Majlis Qonunchilik palatasida deputatlar tomonidan qonunchilik tashabbusi asosida kiritilgan «O‘zbekiston Respublikasining Ma’muriy javobgarlik to‘g‘risidagi kodeksiga o‘zgartirish va qo‘shimchalar kiritish haqida»gi qonun loyihasi muhokama qilindi. Bu haqda Zamin.uz xabar berdi.
Qonun loyihasining asosiy maqsadi jamoat tartibi va osoyishtalikni mustahkamlash, yangi turdagi huquqbuzarliklarning oldini olish hamda huquqbuzarlik uchun javobgarlik mexanizmlarini aniq belgilashdan iborat. Loyihaga ko‘ra, boshqa davlat hududida yoki uning tarafini olib, qurolli to‘qnashuvlar yoki harbiy harakatlarda ishtirok etishni targ‘ib qiluvchi materiallarni tarqatish, reklama qilish va namoyish etish uchun ma’muriy javobgarlik joriy etilmoqda.
Shuningdek, uyatli so‘zlar bilan so‘kinish, haqoratli harakatlar yoki fuqarolarning sha’ni va qadr-qimmatini tahqirlovchi boshqa xatti-harakatlarni telekommunikatsiya tarmoqlari hamda Internet jahon axborot makonida sodir etish uchun ham javobgarlik belgilanishi nazarda tutilgan. Bu orqali axborot makonida huquqiy madaniyatni oshirish va fuqarolar osoyishtaligini ta’minlash maqsad qilinadi.
Bundan tashqari, shaxsning o‘zi tomonidan sodir etilgan huquqbuzarlikni targ‘ib qiluvchi materiallarni ommaviy axborot vositalari va Internet tarmoqlarida tarqatgani uchun ham ma’muriy javobgarlik ko‘zda tutilmoqda. Mazkur normalar huquqbuzarliklarni ommalashtirish va ularga taqlid qilish holatlarini kamaytirishga xizmat qiladi hamda jamiyatda tartib va osoyishtalik muhitini mustahkamlaydi.
Shunday qilib, qonun loyihasi jamiyatning barqarorligi va fuqarolarning huquqiy madaniyatini oshirishga katta hissa qo‘shadi.
