Prezident Shavkat Mirziyoyev Samarqandda Imom Buxoriy majmuasini ziyorat qildi
O‘zbekiston Respublikasi Prezidenti Shavkat Mirziyoyev joriy yilning 3-may kuni amaliy tashrif bilan Samarqand viloyatida bo‘ldi. Bu haqda Zamin.uz xabar berdi.
Davlat rahbari o‘z tashrifini an’anaga muvofiq, islom olamining buyuk mutafakkiri, buyuk muhaddis Imom Buxoriy hazratlari mangu qo‘nim topgan muqaddas majmuani ziyorat qilishdan boshladi. Ushbu tabarruk maskanda Qur’on oyatlari tilovat qilinib, yurtimiz tinchligi va xalqimiz farovonligi haqiga duolar qilindi.
Keyingi yillarda davlat rahbarining shaxsiy tashabbusi bilan Imom Buxoriy majmuasida keng ko‘lamli qurilish va obodonlashtirish ishlari amalga oshirildi. Mazkur bunyodkorlik ishlari natijasida qadamjo nafaqat zamonaviy va muhtasham ko‘rinish oldi, balki buyuk allomaning islom sivilizatsiyasidagi ulkan xizmatlariga munosib ehtirom ramziga aylandi.
Majmuaning yangi qiyofasi o‘zida milliy me’morchilik an’analari va zamonaviy muhandislik yutuqlarini mujassam etgan. Ziyoratgohda ziyoratchilar va sayyohlar uchun yaratilgan sharoitlar tubdan yaxshilandi.
Ma’lumotlarga ko‘ra, ilgari majmua bir vaqtning o‘zida 12 ming kishiga xizmat ko‘rsatish imkoniyatiga ega bo‘lgan bo‘lsa, amalga oshirilgan kengaytirish ishlaridan so‘ng bu ko‘rsatkich 65 ming kishiga yetdi. Ramazon hayiti kunlarida majmuada 60 mingdan ziyod vatandoshimiz va xorijiy mehmonlar bayram namozini emin-erkin ado etishgani buning yaqqol tasdig‘idir.
Majmua qayta ochilganidan buyon o‘tgan bir oy davomida ziyoratchilar soni bir million nafardan oshganini alohida ta’kidlash lozim. Prezident Shavkat Mirziyoyev majmua hududini yanada obod qilish, keluvchilar uchun qo‘shimcha qulayliklar yaratish bo‘yicha mutasaddilarga aniq topshiriqlar berdi.
Xususan, avtotransport vositalari uchun to‘xtash joylarini kengaytirish, dam olish maskanlarini ko‘paytirish va yashil hududlarni barpo etish zarurligi qayd etildi. Shuningdek, majmuadagi sharoitlarni har olti oyda tahlil qilib borish va xizmat ko‘rsatish sifatini muntazam ravishda oshirish vazifasi yuklatildi.
Shu bilan birga, mamlakatimizdagi imom-xatiblarning malakasini ushbu majmuada oshirish, ularning ma’naviy bilimlarini boyitishga e’tibor qaratildi. Davlat rahbari ziyorat madaniyatini yuksaltirish, qadamjolarni doimo pokiza va obod saqlash nafaqat diniy, balki milliy qadriyatlarimizning muhim qismi ekanini ta’kidladi.
Bunday ezgu ishlar yosh avlodni ajdodlar merosiga hurmat ruhida tarbiyalash va ularning ma’naviy dunyosini shakllantirishda beqiyos ahamiyat kasb etadi.
