O'zbekistonda mingdan ortiq xonanda o'z daromadlari haqida deklaratsiya topshirdi
O'zbekistonda san'at ahli o'z daromadlari haqida hisobot berishni boshladi. Bu haqda Zamin.uz xabar berdi.
Soliq qo'mitasi taqdim etgan ma'lumotlarga ko'ra, joriy yilning 1-may holatiga ko'ra, mamlakatimizda faoliyat yuritayotgan 1 100 nafar litsenziyaga ega xonanda o'z daromadlari bo'yicha deklaratsiya topshirdi. Ushbu davr mobaynida san'at vakillari tomonidan jami 6 milliard 478 million so'm miqdorida daromad olingani qayd etilgan.
Mazkur mablag'ning 5,1 milliard so'mi soliqqa tortiladigan qism hisoblanib, natijada 599,7 million so'm miqdorida daromad solig'i hisoblangan. Ijodkorlar ko'rsatgan tushumlari miqdoriga qarab uchta asosiy toifaga ajratildi.
Birinchi guruhga kiritilgan 47 nafar san'atkor jami 1,5 milliard so'm daromad ko'rsatgan bo'lib, ulardan 140,8 million so'm soliq undirilishi belgilangan. Ikkinchi toifadagi 100 nafar ijodkor 901,4 million so'm daromad bildirgan va ularga 83,9 million so'm soliq hisoblangan.
Eng katta guruhni tashkil etuvchi 953 nafar ijodkor esa 4,1 milliard so'm daromad qayd etgan bo'lib, ularning soliq to'lovi 375,2 million so'mni tashkil etadi. Taqdim etilgan hisobotlarning tahlili shuni ko'rsatadiki, deklaratsiyalarning salmoqli qismida daromadlar miqdori ancha past ko'rsatilgan.
Masalan, 375 ta deklaratsiyada yillik daromad 1 million so'mgacha ekani qayd etilgan bo'lib, bu holatda o'rtacha yillik soliq miqdori bor-yo'g'i 54,4 ming so'mga teng kelmoqda. Shuningdek, 576 ta deklaratsiyada daromad 10 million so'mgacha, 102 tasida esa 20 million so'mgacha deb ko'rsatilgan.
Faqatgina barmoq bilan sanarli san'atkorlar, ya'ni 7 nafar ijodkor o'z daromadini 152 million so'mgacha deb bildirgan. Amaldagi tartibga ko'ra, deklaratsiya topshirgan barcha xonandalar hisoblangan soliqlarni 2026-yilning 1-iyuniga qadar to'lashlari lozim.
Shu bilan birga, kelgusi yilning sentyabr oyidan boshlab konsert va tomosha faoliyati bilan shug'ullanuvchi shaxslarni soliqqa tortishning yangi tizimi joriy etilishi kutilmoqda. Bu boradagi tegishli qaror loyihasi jamoatchilik o'rtasida qizg'in muhokamalarga sabab bo'ldi.
Ayrim san'atkorlar litsenziya to'lovlari yetarli ekanini ta'kidlasa, soha mas'ullari va madaniyat vaziri Ozodbek Nazarbekov har bir fuqaro kabi san'atkorlar ham davlat byudjetiga hissa qo'shishi shartligini eslatib o'tdi.
