Toshkentda Qurbon hayiti namozi munosabati bilan ko'chalar yopiladi
Ertaga, 27-may kuni Toshkent shahridagi 119 ta masjidda Qurbon hayiti namozi ado etilishi kutilmoqda. Bu haqda Zamin.uz xabar berdi.
Bu haqda poytaxt Yo‘l harakati xavfsizligi boshqarmasi axborot xizmati rasmiy ma’lumot berdi. Bayram tadbirlarini yuqori saviyada o‘tkazish, jamoat tartibini saqlash hamda namozxonlar uchun qulay sharoitlar yaratish maqsadida shaharning bir qator ko‘chalarida avtotransport vositalarining harakati vaqtincha cheklanadi.
Belgilangan tartibga ko‘ra, cheklovlar 26-may kuni tungi soat 24:00 dan 27-may kuni ertalabki soat 08:00 ga qadar davom etadi. Ushbu chora-tadbirlar poytaxtning deyarli barcha tumanlarini, jumladan, Mirzo Ulug‘bek, Bektemir, Olmazor, Shayxontohur, Chilonzor, Uchtepa, Yunusobod, Yakkasaroy, Sergeli, Yashnobod va Mirobod tumanlarini qamrab oladi.
Asosiy e’tibor yirik masjidlar atrofiga hamda odamlar gavjum bo‘ladigan hududlarga qaratiladi. Xususan, To‘rabuva, Xo‘tan, Alibek, Islomobod va Hazrati Imom kabi tarixiy majmualar atrofidagi yo‘llar vaqtincha yopiladi.
Shuningdek, Shayx Zayniddin, Xo‘ja Alambardor, Ko‘k ota hamda Shayx Muhammad Sodiq Muhammad Yusuf masjidlariga tutash ko‘chalarda ham harakat to‘xtatiladi. Novza, Minor, Mirzo Yusuf va Islom ota masjidlari atrofida ham haydovchilar uchun cheklovlar amal qiladi.
Bu kabi choralar bayram namoziga keluvchi fuqarolarning xavfsizligini ta’minlash va tirbandliklarning oldini olishga xizmat qiladi. Yo‘l harakati xavfsizligi boshqarmasi haydovchilardan ushbu vaqtinchalik cheklovlarni to‘g‘ri tushunishlarini hamda o‘z harakat yo‘nalishlarini oldindan rejalashtirib olishlarini so‘raydi.
Bayram munosabati bilan jamoat transporti harakati ham qayta ko‘rib chiqiladi. Fuqarolarga qulaylik yaratish maqsadida barcha zaruriy choralar ko‘rilgan bo‘lib, yo‘llarda tartibni saqlash uchun soha xodimlari jalb etilgan.
Hayit namozi o‘qib bo‘lingach, ko‘chalarda transport harakati odatdagi tartibda qayta tiklanadi.
