Prezident tadbirkorlar uchun soliq va ma'muriy yengilliklar bilan tanishdi
Prezident Shavkat Mirziyoyev kichik biznes vakillari uchun iqtisodiy va ma’muriy qulayliklarni kengaytirishga qaratilgan yangi takliflar bilan tanishdi. Bu haqda Zamin.uz xabar berdi.
Taqdimot davomida asosan umumiy ovqatlanish va mehmonxona xizmatlari sohasidagi tadbirkorlar faoliyatini yengillashtirish masalalari diqqat markazida bo‘ldi. Sohaga oid qator cheklovlarni olib tashlash va soliq ma’muriyatchiligini soddalashtirish bo‘yicha muhim tashabbuslar ilgari surildi.
Xususan, endilikda kafe, restoran va mehmonxonalarda alkogol hamda tamaki mahsulotlarini naqd pul shaklida sotishga ruxsat berish taklif etilmoqda. Shu bilan birga, qo‘shilgan qiymat solig‘ining bir qismini qaytarishda naqd pulsiz tushum ulushi bo‘yicha amaldagi talabni bekor qilish ko‘zda tutilgan.
Bu o‘zgarishlar tadbirkorlarning hisob-kitob jarayonlarini osonlashtirib, ularning faoliyatidagi ortiqcha byurokratik to‘siqlarni bartaraf etishga xizmat qiladi. Shuningdek, xizmat ko‘rsatish sohasidagi ayrim xodimlarni soddalashtirilgan tartibda ishga qabul qilish va rasmiylashtirish tizimi joriy etilishi kutilmoqda.
Mazkur choralar kichik biznes subyektlari uchun ma’muriy yukni kamaytirish va tadbirkorlarni o‘z faoliyatini qonuniy asosda yuritishga rag‘batlantirish maqsadida ishlab chiqilgan. Mutaxassislarning fikricha, ushbu islohotlar 600 mingdan ortiq kichik biznes subyektining rivojlanishiga ijobiy ta’sir ko‘rsatadi.
Iqtisodiy tahlillarga ko‘ra, soliq tizimining shaffoflashishi natijasida davlat budjetiga har yili kamida 2 trillion so‘m miqdorida qo‘shimcha mablag‘ tushishi kutilmoqda. Davlat rahbari taqdim etilgan takliflarni ma’qullab, tadbirkorlar uchun adolatli va qulay muhit yaratish bo‘yicha mas’ullarga aniq vazifalarni yukladi.
Bunda asosiy e’tibor soliq tizimini raqamlashtirish va biznesni qo‘llab-quvvatlashga qaratiladi. Eslatib o‘tamiz, joriy yilning 1-aprelidan boshlab mamlakatimizda 28 ming turdagi tovar va xizmatlarni faqat bank kartalari orqali sotish tartibi joriy etilgan edi.
Bu ro‘yxatga asosan alkogol va tamaki mahsulotlari kiritilgan bo‘lib, amaliyotda tadbirkorlar, ayniqsa sayyohlar bilan ishlovchi mehmonxonalar va restoranlar uchun muayyan qiyinchiliklar tug‘dirgan edi. Yangi tartib ushbu muammolarni bartaraf etishga yo‘naltirilgan.
