O‘zbekiston Respublikasi Prezidenti Shavkat Mirziyoyev Ozarboyjon Prezidenti Ilhom Aliyevning taklifiga binoan davlat tashrifi bilan Boku shahriga kelib yetib bordi. Bu haqida Zamin.uz xabar berdi.
Poytaxtdagi Haydar Aliyev nomidagi aeroportda davlat rahbarini Ozarboyjon bosh vazirining birinchi o‘rinbosari Yaqub Ayubov hamda boshqa rasmiy shaxslar kutib oldi. Oliy martabali mehmon sharafiga ikki davlat bayroqlari ko‘tarildi va faxriy qorovul saf tortdi.
Bugun dasturga muvofiq, Oliy davlatlararo kengashning ikkinchi yig‘ilishi hamda boshqa muhim tadbirlar o‘tkazilishi rejalashtirilgan. Ushbu tashrif ikki mamlakat o‘rtasidagi do‘stlik va hamkorlikni yanada mustahkamlashga xizmat qiladi.
Shuningdek, siyosiy, iqtisodiy va madaniy sohalarda hamkorlikni rivojlantirish masalalari muhokama qilinadi. Prezident Mirziyoyevning Ozarboyjonga tashrifi mamlakatlar o‘rtasidagi aloqalarni yangi bosqichga olib chiqishi kutilmoqda.
