Ekologik partiya daraxt kesishni taqiqlashni qo‘llab-quvvatlaydi

O‘zbekiston Ekologik partiyasi Murad Buildings kompaniyasi asoschisi Murad Nazarovning Toshkent shahrida daraxt kesishga qo‘yilgan moratoriyni bekor qilish taklifiga qat’iyan qarshi chiqdi. Bu haqida Zamin.uz xabar berdi.

Bu haqda partiya vakili, deputat Javlon Abdullayev rasmiy bayonot bilan chiqdi. Nazarov avvalroq qurilish jarayonida daraxtlar zararlanishi yoki yo‘qolishini hisobga olib, ularni oldindan ekish orqali “daraxtlar banki” tizimini joriy etishni taklif qilgan edi.

Biroq Ekologik partiya ushbu g‘oyani ma’qullamadi. Javlon Abdullayevning so‘zlariga ko‘ra, iqlim o‘zgarishi va suv tanqisligi sharoitida har bir yetilgan daraxt kelajak avlodlar uchun juda muhim hisoblanadi.

Bir dona katta daraxtni yetishtirish o‘nlab yillar davomida ko‘p mehnat va katta mablag‘ talab qiladi. Moratoriy bekor qilinmagani tufayli hozirga kelib daraxtlarning 98 foizi saqlanib qolgan.

Faqatgina 2025 yilning birinchi yarmida daraxt kesish uchun berilgan 3200 ta ariza rad etilib, 453 mingdan ortiq daraxt, jumladan 86 mingdan ziyod qimmatbaho turlar himoyalangan. Shu bilan birga, ekologlar kompensatsiya sifatida ekilgan ko‘chatlarning ko‘pchiligi o‘smasdan qurib qolayotganiga e’tibor qaratmoqda.

Ekologik partiya bayonotida ta’kidlanishicha, har qanday rivojlanish yoki qurilish faqat ekologik manfaatlar hisobiga emas, balki ular bilan muvozanatni saqlagan holda amalga oshirilishi lozim. Bu tamoyil kelajak avlodlar uchun sog‘lom va barqaror muhitni ta’minlashda muhim ahamiyatga ega.