Rossiyalik bolalar Toshkentda ta’tilni boshladi
O‘zaro hamkorlik, insonparvarlik va bolalar do‘stligi ushbu tashabbusning asosiy mezonlari hisoblanadi. Bu haqida Zamin.uz xabar berdi.
O‘zbekiston Kasaba uyushmalari federatsiyasi taklifi bilan Rossiyaning Belgorod va Bryansk viloyatlaridan kelgan 99 nafar bola Toshkent viloyatidagi “Anor” bolalar sog‘lomlashtirish oromgohida ikki haftalik ta’tilni boshladi. Rossiyaning O‘zbekistondagi elchixonasi tomonidan berilgan rasmiy ma’lumotga ko‘ra, bolalarni Toshkent xalqaro aeroportida tantanali kutib olish marosimi o‘tkazildi.
Ushbu tadbirda Rossiyaning O‘zbekistondagi muvaqqat ishlar vakili Andrey Lanchikov, O‘zbekiston Kasaba uyushmalari federatsiyasi rahbarlari hamda Tashqi ishlar vazirligi vakillari ishtirok etdi. Elchixona bayonotida ta’kidlanishicha, bunday ijobiy tashabbus birinchi marta amalga oshirilmoqda.
“O‘zbekiston hukumati tomonidan ko‘rsatilgan samimiy yordam uchun minnatdorchilik bildiramiz. Bu loyiha bolalar uchun unutilmas xotiralar qoldiradi.
Mehmondo‘stlik va iliq munosabatlar uchun alohida tashakkur,” deyiladi. “Anor” oromgohi bolalarga sog‘lomlashish bilan birga, do‘stlar orttirish, turli madaniyatlar bilan tanishish va tabiat bag‘rida maroqli vaqt o‘tkazish imkonini beradi.
Ta’limiy va madaniy dasturlar, sport musobaqalari, ekoturlar hamda ijodiy faoliyatlar bolalarning ta’tilini yanada mazmunli va foydali qiladi. Ushbu loyiha nafaqat ikki mamlakat o‘rtasidagi munosabatlarni mustahkamlashga, balki yosh avlodni hamkorlik, do‘stlik va bag‘rikenglik ruhida tarbiyalashga xizmat qiladi.
Bolalarning olib ketadigan taassurotlari esa mamlakatlar o‘rtasidagi aloqalarni yanada chuqurlashtirishga yordam beradi. Kelgusida bunday tashabbuslarning yana ko‘p marta takrorlanishi va kengroq ko‘lamda amalga oshirilishi kutilmoqda, chunki yosh avlod – kelajak poydevoridir.
