Barselona futbol klubi prezidenti Joan Laporta darvozabon Mark-Andre ter Shtegenning harakatlaridan jiddiy norozi ekanini ma’lum qildi. Bu haqida Euro-football.ru xabar berdi.
Gap shundaki, ter Shtegen klub tomonidan taqdim etilgan uzoq muddatli jarohat haqida tibbiy hujjatni imzolashdan bosh tortdi. Agar u ushbu hujjatni imzolaganida, klub boshqa futbolchini ro‘yxatdan o‘tkazish uchun uning maoshining bir qismini ishlatish imkoniyatiga ega bo‘lardi.
Ma’lumotlarga ko‘ra, ushbu vaziyat tufayli ter Shtegen yaqin soatlarda Barselona sardori maqomidan mahrum bo‘lishi mumkin. Avvalroq bu borada yakuniy qarorni jamoa bosh murabbiyi Xans-Diter Flik qabul qilishi aytilgan edi.
Biroq, jurnalist Aleks Pintanelning xabariga ko‘ra, klub rahbariyati bu masalani o‘z nazoratiga olgan va qarorni o‘zi qabul qilmoqchi. Prezident Joan Laporta aynan ter Shtegenning hujjatni imzolashdan bosh tortgani sababli unga nisbatan norozilik bildirgan.
Hozirgi vaziyatda 33 yoshli futbolchining Barselona sardori sifatidagi o‘rnini saqlab qolish imkoniyati juda past baholanmoqda. Klubda yuzaga kelgan bu holat futbolchining kelajagiga ham ta’sir ko‘rsatishi mumkin.
