Newcastle Voltemadeni 90 millionga sotib oldi

Newcastle jamoasi Stuttgart klubidan hujumchi Nik Voltemadeni 90 million yevroga sotib oldi. Bu haqida Euro-football.ru xabar berdi.

Bavariya yoz davomida nemis futbolchisini o‘z safiga qo‘shishga harakat qilgan, ammo Stuttgart bilan shartnoma shartlarini kelishib ololmagan. Transfer oynasining oxirgi kunlarida 23 yoshli hujumchiga Newcastle jamoasi qiziqish bildirgan va ancha qulay taklif bilan chiqqan.

Stuttgart jamoasi bunday imkoniyatni qo‘ldan boy bermadi. Transfer narxi bonuslar hisobga olingan holda 90 million yevroni tashkil etadi.

Bavariya sport bo‘limi rahbari Maks Eberl shunday dedi: “Bu transfer strategik yoki shoshilinch qaror ekanligini bilmayman, chunki Isak Liverpoolga ketmoqda. Biz uchun Premer-ligadagi holatlar muhim emas.

Haqiqat shundaki, u yerda katta pul to‘lanmoqda va to‘lanaveradi. Biz esa o‘z strategiyamizga amal qilamiz – oqilona harakat qilib, ichki va xalqaro maydonda muvaffaqiyatga erisha oladigan jamoa yaratamiz.” Agar mish-mishlarga ishonilsa, Myunxen klubi Nik Voltemade uchun 70 million yevrodan kamroq taklif qilgan.