Modrich Milan bilan kelajagini o‘zi belgilaydi

Milan jamoasining yarim himoyachisi Luka Modrich yaqinda 40 yoshga to‘ladi, biroq hozircha faoliyatini yakunlashni rejalashtirmayapti. Bu haqida Euro-football.ru xabar berdi.

Xorvatiyalik futbolchi o‘tgan yozda Madridning Real jamoasini tark etib, erkin agent sifatida Rossoneri safiga qo‘shildi. Uning Italiya klubi bilan tuzgan shartnomasi kelasi yil o‘rtalarigacha amal qiladi, ammo 2026/27 mavsumi oxirigacha uzaytirish imkoniyati mavjud.

Jurnalist Matteo Moretto ma’lumotiga ko‘ra, shartnomani uzaytirish haqida qarorni futbolchi o‘zi qabul qiladi. Agar u xohlamasa, avtomatik uzaytirish bandi faollashmaydi.

Luka Modrich Real jamoasida 13 yil davomida o‘ynadi. Avvalgi ma’lumotlarga ko‘ra, u 2026 yilda, Jahon chempionati tugagach, faoliyatini yakunlashni rejalashtirayotgani aytilgan edi.

Biroq, hozircha futbolchidan bu borada hech qanday rasmiy tasdiq kelgani yo‘q. Modrichning kelajagi va faoliyatini davom ettirish masalasi hali ochiq qolmoqda.

U o‘zining katta tajribasi va mahorati bilan jamoasiga katta hissa qo‘shishda davom etmoqda.