Mbappe sabab Fransiya Argentina o‘yinidan bosh tortdi
Fransiya terma jamoasi kapitan Kilian Mbappe Argentina bilan do‘stona o‘yinni o‘tkazish taklifiga qarshi chiqdi. Bu haqida Euro-football.ru xabar berdi.
O‘tgan yili Fransiya futbol federatsiyasi 2022 yilgi Jahon chempionati finalini takrorlash haqida o‘ylagan edi, biroq Mbappe bu g‘oyani qo‘llamadi. L'Equipe nashrining xabar berishicha, hujumchi bu masalaga aralashib, mavsumning eng serband davrida uzoq vaqtdan davom etadigan parvoz futbolchilarning holatiga salbiy ta’sir ko‘rsatishini ta’kidlagan.
Federatsiya futbolchining fikrini inobatga olib, ushbu taklifni rad etdi. Eslatib o‘tamiz, 2022 yilgi Jahon chempionati finali dekabr oyida Qatarda o‘tkazilgan.
O‘yin asosiy vaqtda 3:3 hisobida yakunlanib, penaltilar seriyasida Argentina jamoasi g‘olib bo‘lgan. Kilian Mbappe esa o‘sha o‘yinda het-trik qayd etgan edi.
