Liverpul Kyezega taklifni rad etdi
«Liverpul» klubi hujumchi Federico Kyezani sotishga rozi bo‘lmadi. Bu haqida Euro-football.ru xabar berdi.
Turkiya chempionatida transfer oynasi yopilishidan oldingi oxirgi kunlarda 27 yoshli futbolchini o‘z safiga qo‘shmoqchi bo‘lgan «Beshiktosh» jamoasi futbolchiga taklif yuborgan, biroq «qizillar» rad javobini bergan. Mashhur futbol insayderi Fabrizio Romano ma’lumotlariga ko‘ra, Istanbul klubi Kyezani sotib olish bo‘yicha muzokaralar olib borgan, ammo Liverpul jamoasi uni qo‘yib yubormaslikka qaror qilgan.
Federico Kyezaning Liverpul bilan tuzgan shartnomasi 2028 yilning o‘rtalarigacha amal qiladi. Transfermarkt saytidagi baholashga ko‘ra uning transfer qiymati taxminan 14 million yevroni tashkil etadi.
Joriy mavsumda futbolchi Arne Slot boshchiligidagi jamoa safida uchta o‘yinda maydonga tushib, bitta gol urishga muvaffaq bo‘lgan. Shu bilan birga, Kyеzaning jamoaga qo‘shgan hissasi va uning kelajakdagi o‘yinlari Liverpul uchun muhim ahamiyatga ega bo‘lib qolmoqda.
Klub rahbariyati futbolchini ushlab qolishga va uning rivojlanishini ta’minlashga intilmoqda.
