Garri Keyn "Bavariya"da qolishi kutilmoqda

Myunxenning "Bavariya" klubi hujumchisi Garri Keynning kelajagi borasida aniqlik kiritildi. Bu haqda Zamin.uz xabar berdi.

Klubning sport direktori Maks Eberl futbolchi bilan yangi shartnoma tuzish bo‘yicha muzokaralar olib borilayotganini tasdiqladi. Bu haqda euro-football.ru xabar berdi.

Nemis Sky jurnalisti Florian Plettenbergning ma’lum qilishicha, Maks Eberl Keyn bilan kelishuv masalasida faol muloqot qilayotganini aytgan. Muzokaralar 2028 yoki 2029 yilgacha mo‘ljallangan yangi shartnoma ustida olib borilmoqda.

Manbalarga ko‘ra, Garri Keyn shartnomani uzaytirishga ijobiy munosabat bildirmoqda va hozircha transfer haqida o‘ylamayapti. Eslatib o‘tamiz, Garri Keyn 2023 yil yozida "Bavariya" safiga qo‘shilgan edi.

Shu vaqt davomida u klub safida 126 ta o‘yinda maydonga tushib, 119 ta gol urdi va 30 ta golli pas berdi. Keynning samaradorligi va jamoaga qo‘shayotgan hissasi uni klubning muhim o‘yinchilaridan biriga aylantirgan.

Hozirda uning kelajagi borasidagi muzokaralar davom etmoqda.