Usmon Dembele Saudiya klublarining transfer nishonida
PSJ hujumchisi Usmon Dembele Saudiya Arabistoni chempionatiga o‘tishi mumkinligi haqida xabarlar tarqaldi. Bu haqda Zamin.uz xabar berdi.
Bu haqda Sky Sports ma’lumotiga tayanib euro-football.ru xabar bermoqda. Manbalarga ko‘ra, Saudiya Arabistonidagi boy klub egalari Dembelega qiziqish bildirishgan va uni yozgi transfer oynasida o‘z safiga qo‘shib olish bo‘yicha ish boshlashgan.
Ammo transfer qiymati hozircha oshkor qilinmagan va Dembele aynan qaysi klubning maqsadi ekani ham aniq emas. Avvalroq Usmon Dembele PSJ bilan shartnomasini uzaytirish uchun juda yuqori maosh talab qilayotgani haqida ma’lumotlar paydo bo‘lgandi.
Biroq PSJ prezidenti klubda belgilangan maosh chegarasi hatto jamoaning asosiy yulduzlari uchun ham oshirilmasligini qat’iy ta’kidlagan. Transfermarkt ma’lumotlariga ko‘ra, 28 yoshli Dembele hozirda 100 million yevroga baholanmoqda.
Shu sababli, uning transferi katta mablag‘ evaziga amalga oshishi kutilmoqda. Saudiya Arabistoni chempionati esa so‘nggi yillarda ko‘plab yulduz futbolchilarni jalb qilgani bilan e’tiborni tortmoqda.
