Karim Benzema Turkiya Superligasiga o‘tishi mumkin
Karim Benzema futbol olamidagi yulduzlardan biri bo‘lib, uning Saudiya Arabistonidagi faoliyati yakunlanish arafasida turgani haqida xabarlar tarqalmoqda. Bu haqda Zamin.uz xabar berdi.
Fransiyalik hujumchi «Al-Ittihod» klubida o‘zini qulay his qilmayotgani va yangi klubga o‘tishni rejalashtirayotgani aytilmoqda. Ayni paytda Benzema klub bilan shartnoma shartlaridan norozi.
Unga taklif qilingan yangi bitim moliyaviy jihatdan uni qoniqtirmagan. Futbolchi shartnoma shartlariga e’tiroz sifatida navbatdagi o‘yinda maydonga tushishdan bosh tortgani haqida xabar berilgan.
Ma’lumotlarga ko‘ra, Benzema Saudiya Arabistonini tark etib, Yevropa yoki AQSh ligalariga qaytishni o‘ylamoqda. Uning «Al-Ittihod» bilan amaldagi shartnomasi 2026-yilgacha mo‘ljallangan bo‘lsa-da, tomonlar bu kelishuvni bekor qilishi kutilmoqda.
Shu bilan birga, Turkiyaning «Beshiktosh» klubi fransiyalik hujumchini o‘z safiga qo‘shib olish uchun faol harakat qilmoqda. Klub Benzema transferi uchun 3 million yevro taklif qilgani ma’lum.
«Beshiktosh» Temmi Abraxamning o‘rnini aynan Benzema bilan to‘ldirishni maqsad qilgan. So‘nggi yillarda Turkiya Superligasi ko‘plab mashhur futbolchilar uchun jozibador manzilga aylangan.
Viktor Osimxen, Mauro Ikardi, Leroy Sane kabi yulduzlar hozirda Turkiyada to‘p surmoqda. Shuningdek, o‘zbek futbolchisi Eldor Shomurodov ham Turkiya chempionatida muvaffaqiyatli o‘yin ko‘rsatib kelmoqda.
U «Istanbul Bashakshehir» jamoasida 20 o‘yinda 14 gol urib, Superliga to‘purarlari ro‘yxatida yetakchi bo‘lib turibdi. Agar muzokaralar muvaffaqiyatli yakunlansa, yaqin vaqt ichida Eldor Shomurodov va Karim Benzemani bir chempionatda, raqobatda ko‘rishimiz mumkin.
Sizningcha, Benzemaning Turkiyaga o‘tishi uning faoliyati uchun to‘g‘ri qarormi yoki u AQSh ligasini tanlagani ma’qulmi?
