Abduqodir Husanov Osiyoning eng qimmat futbolchisi deb topildi
Transferlar va futbolchilar bozor qiymatlari haqida ma’lumot beruvchi nufuzli Transfermarkt portali yaqinda bir qator milliy chempionatlardagi futbolchilarning transfer baholarini yangiladi. Bu haqda Zamin.uz xabar berdi.
Shu yangilanishlar asosida turli sport nashrlari qiziqarli tahlillar tayyorlamoqda. Xususan, Vetnamning Znews.vn portali Osiyo qit’asidan chiqqan eng qimmat futbolchilar ro‘yxatini tuzdi.
Reytingda sakkiz nafar osiyolik futbolchi bor, ular orasida Yevropa chempionatlarida o‘z iqtidorini namoyon etayotgan va yuqori baholangan yulduzlar uchraydi. Ro‘yxat boshida O‘zbekiston milliy jamoasi himoyachisi Abduqodir Husanov turibdi.
U hozirda Angliyaning “Manchester Siti” klubida o‘ynaydi. Husanov tezkorligi, maydondagi vaziyatni aniq baholay olishi va himoyadagi ishonchliligi bilan mutaxassislarning e’tiborini tortmoqda.
Transfermarkt ma’lumotiga ko‘ra, uning transfer qiymati taxminan 35 million yevroni tashkil etadi. Bu ko‘rsatkich uning nafaqat hozirgi formasini, balki kelajakdagi katta salohiyatini ham ifodalaydi.
Ikkinchi o‘rinni Yaponiya milliy jamoasi va “Real Sosedad” klubining hujumchisi Takefuso Kubo egallaydi. Uning transfer qiymati 30 million yevroga baholangan.
Kubo yuqori texnikasi, tezkor driblingi va hujumdagi kreativligi bilan mashhur. So‘nggi yillarda u yapon futbolining yorqin va barqaror yulduzlaridan biri hisoblanadi.
Uchinchi o‘rinda yana bir yapon futbolchisi Kayshu Sano bor. U Germaniyaning “Mayns 05” klubida yarim himoyachi sifatida o‘ynaydi.
Sano transfer qiymati 25 million yevroni tashkil qiladi. U to‘pni olib qo‘yish, raqib hujumlarini to‘xtatish va maydonda intizomli o‘ynashi bilan ajralib turadi.
Janubiy Koreyadan Li Kan In ham 25 million yevro bahoga ega. U Fransiyaning “PSJ” klubida faoliyat yuritadi.
Li Kan In individual texnikasi, hujumlarni tashkil etishdagi kreativligi va pleymeykerlik mahorati bilan tanilgan. U Osiyo futbolining eng ijodkor hujumchilaridan biridir.
Angliya Premer-ligasida o‘ynayotgan yana bir yapon futbolchisi Kaoru Mitoma ham 25 million yevroga baholangan. U yuqori tezligi, texnik harakatlari va qanot hujumchisi sifatidagi samaradorligi bilan e’tiborni tortadi.
Manba: One.uz
