Shoxasan Mirzamatov Octagon chempionligi uchun kurashadi
O‘zbekistonlik taniqli MMA jangchisi Shoxasan Mirzamatov (16-4) Octagon ligasining chempionlik kamarini qo‘lga kiritishga tayyorligini ishonch bilan ma’lum qildi. Bu haqda Zamin.uz xabar berdi.
U bu yo‘lga osonlik bilan erishmaganini ta’kidladi. Bu muvaffaqiyat ortida uzoq mehnat, mashaqqatli tayyorgarlik va hayotdagi turli sinovlar borligini aytdi.
Shoxasan Mirzamatov chempionlik jangi uchun ko‘p harakat qilganini, ba’zan hayotdagi qiyinchiliklar uning orzulariga to‘sqinlik qilganini bildirdi. Ba’zi odamlar uni boshqa jangchilardan qo‘rqayotgan deb o‘ylashgan, ammo u oktagonda hech qachon qo‘rquvni his qilmaganini ta’kidladi.
U bo‘lajak raqibi Bogdan Pshebelski (7-2) haqida ham fikr bildirdi va hazil tariqasida unga jangda qo‘llarini balandroq ko‘targani ma’qul ekanini maslahat berdi. Shunday qilsa, uning boshiga zarba berish qiyin bo‘ladi, dedi Shoxasan.
Jangchi, shuningdek, bo‘lajak bahs uzoq davom etmasligiga ishonch bildirdi. Uning fikricha, jang tez tugaydi va amaldagi chempion Toshkentda mag‘lub bo‘ladi.
Yangi kamarni esa o‘zbek xalqiga sovg‘a qilish niyatida ekanini ma’lum qildi. Ma’lumot uchun, Shoxasan Mirzamatov 2 aprel kuni Toshkentdagi Humo Arena majmuasida o‘tkaziladigan Octagon 85 turnirida Bogdan Pshebelskiga qarshi yarim o‘rta vazn chempionlik kamari uchun hal qiluvchi jangda ishtirok etadi.
Ushbu to‘qnashuv nafaqat sport ixlosmandlari, balki barcha MMA muxlislari uchun qiziqarli va shiddatli kechishiga ishoniladi. Toshkentdagi bu tadbir haqiqiy shou bo‘lib o‘tadi va qolgan tafsilotlar oktagonda hal bo‘ladi.
Manba: One.uz
