«Yuventus» Alisson va Bernardo Silvani sotib olishni rejalashtirmoqda

Italiyaning "Yuventus" klubi kelgusi yozgi transfer mavsumi uchun keng ko‘lamli rejalarni belgilab oldi. Bu haqda Zamin.uz xabar berdi.

Klub rahbariyati va murabbiylar shtabi tarkibni tubdan yangilash hamda Italiya chempionligi uchun kurashga jiddiy qaytishni maqsad qilgan. Ushbu jarayonda asosiy e’tibor tajribali va o‘zini ko‘rsatgan futbolchilarni jamoaga jalb etishga qaratiladi.

Goal.com nashri bergan ma’lumotlarga ko‘ra, Turin klubi rahbari Damien Komolli va bosh murabbiy Luchano Spalletti ayni damda bir necha jahon darajasidagi yulduzlarning nomzodini ko‘rib chiqmoqda. Turinliklarning asosiy nishonida "Liverpul" darvozaboni Alisson Bekker hamda "Manchester Siti" yarim himoyachisi Bernardo Silva turibdi.

Ayniqsa, Silva iyun oyida erkin agentga aylanishi kutilayotgani sababli, u klub uchun eng jozibador nomzodlardan biri bo‘lib qolmoqda. Shuningdek, maydon markazini yanada kuchaytirish maqsadida "Marsel" jamoasi a’zosi Pyer-Emil Xoybergni ham tarkibga qo‘shib olish masalasi muhokama qilinmoqda.

Klub rahbariyati yosh va hali tajribasi yetarli bo‘lmagan o‘yinchilar bilan tavakkal qilishdan ko‘ra, yuqori bosim ostida o‘ynashga o‘rgangan yulduzlarga tayanishni afzal ko‘rmoqda. Hujum chizig‘idagi o‘zgarishlar esa bevosita Dushan Vlaxovich bilan shartnomaning uzaytirilishi hamda Randal Kolo Muani kabi iqtidorli futbolchilarning kelajagi bilan bog‘liq bo‘ladi.

Damien Komolli jamoaning poydevori allaqachon shakllanganini, biroq endigi bosqichda Turindagi katta talablarga dosh bera oladigan kuchli shaxslar kerakligini ta’kidladi. Uning so‘zlariga ko‘ra, ko‘plab taniqli futbolchilar klubning kelasi mavsumda qaysi yevrokubok musobaqasida ishtirok etishidan qat’i nazar, "Yuventus" sharafini himoya qilishga tayyor ekanliklarini bildirganlar.

Bu esa jamoaning nufuzi hamon yuqori ekanidan dalolat beradi.