Eder Militao jarohati sabab jahon chempionatini o'tkazib yuboradi
Madridning Real Madrid klubi va Braziliya milliy terma jamoasining mahoratli himoyachisi Eder Militao faoliyatida ogir davrni boshdan kechirmoqda. Bu haqda Zamin.uz xabar berdi.
So‘nggi olingan ma’lumotlarga ko‘ra, futbolchi jarohati sababli 2026-yilda AQSH, Meksika va Kanada hududlarida tashkil etiladigan jahon chempionati bahslarini o‘tkazib yuborishga majbur bo‘ladi. Bu xabar nafaqat klub ishqibozlarini, balki butun Braziliya futbol jamoatchiligini tashvishga soldi.
Taniqli insayder Fabritsio Romanoning qaymoqranglilar murabbiylar shtabiga tayanib bergan xabariga ko‘ra, Militao yaqin kunlarda Finlyandiyada jarrohlik amaliyotini o‘tkazadi. Shifokorlarning dastlabki xulosalariga ko‘ra, himoyachining tiklanish jarayoni uzoq vaqt talab etadi va u maydonga faqat kelasi yilning oktyabr oyidagina qaytishi mumkin.
Bu esa uning jahon chempionati kabi nufuzli musobaqada ishtirok etish imkoniyatini butunlay yo‘qqa chiqaradi. Afsuski, jarohatlar bilan bog‘liq muammolar Militaoni joriy mavsumda tez-tez ta’qib qilmoqda.
Mazkur shikastlanish futbolchi uchun 2025-2026-yilgi mavsum hisobidan to‘rtinchi jiddiy jarohat bo‘ldi. Sog‘lig‘idagi bunday beqarorlik tufayli u hozirga qadar jami yigirma yettita uchrashuvda maydonga tusha olmadi.
Himoya chizig‘idagi asosiy ustunlardan biri bo‘lgan futbolchining uzoq muddatga safdan chiqishi Real Madrid va Braziliya terma jamoasi uchun katta yo‘qotish hisoblanadi. Eslatib o‘tamiz, bo‘lajak jahon chempionatining guruh bosqichida Braziliya terma jamoasi Marokash, Gaiti va Shotlandiya vakillariga qarshi bahs olib boradi.
Militaoning yo‘qligi jamoa mudofaa chizig‘ida sezilarli bo‘shliqni yuzaga keltirishi mumkin. Endilikda terma jamoa murabbiylar shtabi ushbu muhim turnirda uning o‘rnini bosa oladigan munosib nomzodni topish ustida bosh qotirishiga to‘g‘ri keladi.
One.uz sayti ma’lumotlariga ko‘ra, futbolchining sog‘lig‘i bilan bog‘liq vaziyat mutaxassislar nazoratida bo‘lib turibdi.
