Rafael Markes Meksika milliy terma jamoasi bosh murabbiyi bo'ldi
Meksika futbolining afsonaviy vakili Rafael Markes mamlakat milliy terma jamoasi bosh murabbiyi etib rasman tayinlandi. Bu haqda One.uz xabar beradi.
Ko‘p yillar davomida jahon futbolida o‘z o‘rniga ega bo‘lgan sobiq himoyachi oldiga 2030-yilgi jahon chempionatida jamoani yuksak marralarga olib chiqish vazifasi qo‘yildi. Goal.com nashri bergan ma’lumotlarga ko‘ra, ushbu tayinlov Meksika futbol federatsiyasining uzoq muddatli strategik rejalarining bir qismi hisoblanadi.
Ma’lum qilinishicha, 47 yoshli mutaxassis ushbu mas’uliyatli lavozimga kelishdan avval tajribali murabbiy Xavier Agirre boshchiligidagi shtabda yordamchi sifatida faoliyat yuritib kelayotgan edi. Meksika terma jamoasi o‘tgan yirik musobaqalarda kutilgan natijalarni qayd eta olmagach, federatsiya rahbariyati jamoa tarkibi va boshqaruv tizimida tub o‘zgarishlar qilishga qaror qildi.
Markesning tayinlanishi muxlislar va mutaxassislar tomonidan ijobiy kutib olindi. Yangi murabbiyning rejalari va maqsadlari "Barselona" klubining sobiq yulduzi Rafael Markes futbolchi sifatida beshta jahon chempionatida ishtirok etgan noyob sportchilardan biri sanaladi.
Biroq u o‘yinchi sifatida har safar nimchorak final bosqichidan o‘ta olmagan edi. Endilikda u murabbiylik kursisida o‘tirib, futbolchilik davrida erisha olmagan yutuqlarini qo‘lga kiritishni hamda Meksika terma jamoasining ko‘p yillik "chorak final to‘sig‘i"ni yengib o‘tishni o‘z oldiga asosiy maqsad qilib qo‘ygan.
Markes o‘zining ilk rasmiy chiqishida ushbu imkoniyatdan unumli foydalanishini ta’kidladi. Uning so‘zlariga ko‘ra, futbolchi sifatidagi boy tajribasi yangi ishida asqotadi, biroq murabbiylik mas’uliyati ancha yuqori ekanligini yaxshi his qilmoqda.
Mutaxassis kelgusida og‘ir sinovlar bo‘lishini tushunishini, ammo jamoa bilan birgalikda barcha qiyinchiliklarni yengib o‘tishga ishonishini bildirdi. Tajribali murabbiylar shtabi shakllantirildi Yangi bosh murabbiy o‘z faoliyatini noldan boshlamayotganini, balki shakllangan tizimni yanada takomillashtirishini ma’lum qildi.
Unga yordam berish uchun tajribali mutaxassislardan iborat kuchli shtab shakllantirildi. Xususan, to‘rtta jahon chempionatida u bilan birga to‘p surgan sobiq jamoadoshi Andres Guardado, shuningdek, Xuan Manuel Lillo va Vidal Paloma kabi mutaxassislar murabbiylar korpusidan o‘rin oldi.
Markesning ta’kidlashicha, Xavier Agirre bilan birga ishlagan davri unga jamoa ichidagi muhitni va futbolchilarning imkoniyatlarini yaxshi o‘rganish imkonini bergan. Hozirda shakllangan murabbiylar guruhi eng yuqori darajadagi musobaqalarda ishlash tajribasiga ega bo‘lib, bu omil 2030-yilgi jahon chempionatiga tayyorgarlik ko‘rishda hal qiluvchi ahamiyat kasb etishi kutilmoqda.
