Rossiya va Xitoy Oyda yangi stansiya quradi
Rossiya va Xitoy hamkorligida dunyo miqyosida muhim hisoblangan yirik kosmik dastur ishga tushirilmoqda. Bu haqida Zamin.uz xabar berdi.
Xitoy Xalq Respublikasi raisi Si Szinpin Shanxay hamkorlik tashkiloti davlat rahbarlari kengashining 25-yig‘ilishida yangi tashabbus bilan chiqdi. U barcha SHHTga a’zo davlatlarni Rossiya bilan birgalikda amalga oshirilayotgan loyiha ishlariga qo‘shilishga chaqirdi.
Mazkur loyiha Xalqaro ilmiy oy stansiyasi qurilishini nazarda tutadi. Bu dastur “Roskosmos” va Xitoy milliy kosmik boshqarmasi o‘rtasida kelishilgan qo‘shma loyiha hisoblanadi.
Rejaga ko‘ra, stansiya qurilishi 2031 yildan 2035 yilgacha davom etadi. Xitoyning uzoq kosmosni o‘rganish dasturi rahbari Vu Yanxua bildirishicha, 2035 yilda stansiya Oyning janubiy qutbida joylashtiriladi.
Ushbu hududda 100 kilometr radiusda ilmiy tadqiqotlar olib borish imkoniyati yaratiladi. Bu loyiha nafaqat Rossiya va Xitoy, balki butun insoniyat uchun muhim ilmiy yutuqlar eshigini ochadi.
Oyda quriladigan stansiya yordamida geologiya, astronomiya, atmosfera va boshqa fan sohalarida keng ko‘lamli tadqiqotlar amalga oshirilishi mumkin bo‘ladi. Oyda xalqaro baza qurish g‘oyasi ilk bor 2021 yilda e’lon qilingan edi.
O‘sha paytda bu tashabbus ko‘plab davlatlar va mutaxassislar tomonidan qiziqish bilan kutib olindi. Hozir esa loyiha amaliy bosqichga o‘tmoqda va uning amalga oshirilishi kutilmoqda.
