Jeffri Hinton sun’iy intellekt xavfini ogohlantirdi
Sun’iy intellekt sohasining yetakchi olimlaridan biri, “AI otasi” nomi bilan tanilgan Jeffri Hinton insoniyatni jiddiy xavf haqida ogohlantirdi. Bu haqda Zamin.uz xabar berdi.
Uning fikricha, sun’iy intellekt texnologiyalari yaqin yillarda mehnat bozorini tubdan o‘zgartiradi va bu o‘zgarishlarning aksariyati ijobiy bo‘lmasligi mumkin. Hinton ta’kidlashicha, ushbu texnologik inqilob ayrim insonlarni boyitadi, ammo ko‘pchilikning hayot darajasi pasayadi.
U kapitalistik tizimning tabiati bunga sabab ekanini aytdi. Olim so‘zlariga ko‘ra, yirik korporatsiyalar sun’iy intellektdan keng foydalanishi natijasida ishsizlik ko‘lamining oshishi ehtimoli yuqori.
Ayniqsa, ofis xodimlari, buxgalterlar, ma’muriy va analitik kadrlar eng katta xavf ostida turadi, chunki bu sohalarda avtomatlashtirish darajasi yuqori bo‘ladi. Texnologiya ishlab chiqaruvchilari “AI ish o‘rinlarini yo‘q qilsa, yangi ish o‘rinlari ham yaratadi” deya ishontirishga harakat qiladi, ammo Hinton bu fikrga shubha bilan qaraydi.
Xalqaro mehnat tashkilotining so‘nggi hisobotlariga ko‘ra, aynan ofis lavozimlari sun’iy intellekt ta’sirida eng zaif bo‘lib chiqdi. 2040 yilga kelib AQShda ish o‘rinlarining taxminan 25 foizi yo‘qolishi mumkin.
Shuningdek, Hinton universal asosiy daromad g‘oyasini ham ma’qullamaydi. Unga ko‘ra, bu yechim ishsizlikning iqtisodiy oqibatlarini qisman yengillashtirishi mumkin, ammo insonning qadr-qimmatini tiklay olmaydi.
Odamlar faqat pul uchun emas, balki foydali va kerakli ekanligini his qilish uchun ham ishlaydi. Agar bu tuyg‘u yo‘qolsa, jamiyat ruhiy jihatdan zaiflashadi.
Jeffri Hinton yaqin 5-20 yil ichida inson qobiliyatidan ustun “superintellekt” paydo bo‘lishi mumkinligini ham ta’kidladi. Bu voqea insoniyat tarixida yangi burilish bo‘lib, foydali taraqqiyot yoki halokatli oqibatlarga olib kelishi mumkin.
Uning fikricha, hozirgi eng muhim vazifa – sun’iy intellekt rivojini nazorat ostida ushlab, uning ijtimoiy ta’sirini boshqarishdir. “AI insoniyatga katta foyda keltirishi mumkin, ammo uni boshqara olmasak, u bizni boshqarishi mumkin”, – dedi u.
Hozirgi kunda jahon hamjamiyati sun’iy intellektni boshqarish bo‘yicha yagona yondashuvga ega emas. Shunga qaramay, Hintonning ogohlantirishi sun’iy intellektning cheksiz rivoji nafaqat texnologik, balki axloqiy xavf ham ekanini yana bir bor ko‘rsatdi.
