Gucci va Google hamkorlikda aqlli ko'zoynaklar ishlab chiqaradi
Mashhur lyuks moda uyi Gucci 2027 yilga qadar Google kompaniyasi bilan hamkorlikda suniy intellekt imkoniyatlariga asoslangan aqlli ko'zoynaklarni ishlab chiqarishni rejalashtirgan. Bu haqda Zamin.uz xabar berdi.
Ushbu yangilik yirik brendning texnologik kiyiladigan qurilmalar bozoriga ilk bor kirib kelayotganini anglatadi. Yangi mahsulot bozorda Meta va EssilorLuxottica hamkorligida yaratilgan Ray Ban aqlli ko'zoynaklariga jiddiy raqobatdosh bo'lishi kutilmoqda.
Ushbu loyiha Google uchun o'n yil avval muvaffaqiyatsiz yakunlangan Google Glass tajribasidan keyin kiyiladigan texnologiyalar sohasiga qaytish uchun ikkinchi imkoniyatdir. Shuningdek, kompaniya joriy yilning oxirigacha Android XR tizimida ishlovchi va hozirda Project Aura deb nomlanuvchi birinchi ko'zoynaklarini taqdim etishi kutilmoqda.
Soha mutaxassislari aqlli ko'zoynaklarning keng ommalashuvi uchun ularning tashqi ko'rinishi va uslubi hal qiluvchi ahamiyatga ega ekanligini ta'kidlamoqdalar. Google avvalroq Warby Parker va Gentle Monster kabi brendlar bilan hamkorlik qilgan bo'lsa da, Gucci bilan tuzilgan kelishuv Meta kompaniyasi bilan raqobatda ustunlikka erishish uchun zarur nufuzni ta'minlaydi.
Snap kompaniyasining rahbari Evan Spiegel moda brendlari bilan hamkorlik qilish texnologiya korporatsiyalariga taniqli nomlardan foydalanish imkonini berishini qayd etdi. Uning fikricha, zamonaviy iste'molchilar yuzlarida katta korporativ logotiplarni ko'rishni xohlamaydilar, shuning uchun moda va texnologiya uyg'unligi mahsulotlarning jozibadorligini oshiradi.
