Yangi iPhone 17 foydalanuvchilari smartfon quvvati bilan bog'liq muammolardan shikoyat qilmoqda
Yangi avlod iPhone 17 turkumidagi smartfonlar, jumladan, iPhone 17 Pro, iPhone 17 Pro Max va iPhone Air modellari foydalanuvchilari qurilma quvvati to‘liq tugab o‘chganidan so‘ng uni qayta yoqishda jiddiy qiyinchiliklarga duch kelishmoqda. Bu haqda Zamin.uz xabar berdi.
Internetdagi ommabop munozara maydonchalarida qoldirilayotgan ko‘plab xabarlarga ko‘ra, ushbu nosozlik keng ko‘lamli tus olgan va ko‘plab xaridorlarni tashvishga solmoqda. Mazkur muammo haqidagi ma’lumotlar bir qator nufuzli texnologik nashrlar tomonidan ham tasdiqlandi.
Muammo haqida dastlabki shikoyatlardan biri iPhone 17 Pro Max rusumli smartfon egasidan tushgan. Foydalanuvchining ta’kidlashicha, qurilma quvvati ilk bor bir foizga tushib, butunlay o‘chganidan keyin u quvvatlash moslamasiga ulanganda hech qanday belgi bermagan.
Keyinchalik boshqa foydalanuvchilar ham nafaqat yuqori toifadagi modellar, balki oddiy iPhone 17 va yangi iPhone Air qurilmalarida ham shunday holat kuzatilayotganini ma’lum qilishgan. Bu esa muammoning muayyan bir modelga tegishli emasligini ko‘rsatadi.
Ayrim vaziyatlarda smartfon quvvatlash uskunasiga ulangach, o‘n-o‘n besh daqiqa o‘tib o‘z-o‘zidan yonib ketgan bo‘lsa, ba’zi holatlarda foydalanuvchilar qurilmaning hayotga qaytishini bir necha soat davomida kutishlariga to‘g‘ri kelgan. Eng qiziq jihati shundaki, an’anaviy simli quvvatlash usuli yordam bermagan vaziyatlarda MagSafe simsiz quvvatlash texnologiyasi yagona chora bo‘lib xizmat qilmoqda.
Simsiz quvvatlagich yordamida ko‘plab foydalanuvchilar o‘z qurilmalarini qayta ishga tushirishga muvaffaq bo‘lishgan. Hozircha ushbu texnik nosozlikning aniq sababi ochiqlanmagan.
Soha mutaxassislari mazkur holatni operatsion tizimdagi xatolik yoki batareyaning quvvat darajasini o‘lchash tizimidagi kamchiliklar bilan bog‘lashmoqda. Ishlab chiqaruvchi kompaniya hozircha ushbu vaziyat bo‘yicha rasmiy bayonot bermadi, biroq foydalanuvchilarga smartfon quvvatini nol foizgacha tushirib yubormaslik tavsiya etilmoqda.
Ehtimol, yaqin kunlarda chiqariladigan dasturiy yangilanishlar orqali ushbu muammo bartaraf etiladi.
