«Samsung» kompaniyasining yangi aqlli ko'zoynaklari ilk bor ko'rinish berdi
Internet tarmoqlarida Janubiy Koreyaning Samsung kompaniyasi tomonidan ishlab chiqilayotgan yangi Galaxy Glasses aqlli ko‘zoynaklarining ilk tasvirlari tarqaldi. Bu haqda Zamin.uz xabar berdi.
Ushbu qurilma tashqi ko'rinishi bilan ko'pchilikka tanish bo'lgan klassik quyosh ko'zoynaklarini yodga soladi. Biroq uning o‘ziga xos jihati shundaki, ko‘zoynak ramkasining yon tomonlarida atrofni suratga olish va video tasvirga tushirish imkonini beruvchi maxsus kameralar joylashtirilgan.
Mazkur yangilik texnologiya olamidagi nufuzli manbalar tomonidan tasdiqlandi. Yangi avlod gadjeti Android XR operatsion tizimi asosida faoliyat yuritadi va unga Google Gemini sun’iy intellekt texnologiyasi integratsiya qilinadi.
E’tiborli jihati shundaki, ushbu qurilmada an’anaviy displey yoki ekran mavjud emas. Foydalanuvchilar barcha amallarni va buyruqlarni to‘liq ovoz orqali boshqarishadi.
Aqlli ko‘zoynak yordamida matnlarni bir tildan boshqa tilga tezkor tarjima qilish, joriy ob-havo ma’lumotlarini olish yoki birgina ovozli buyruq bilan lahzalarni muhrlash mumkin bo‘ladi. Texnik jihatdan qurilma zamonaviy Qualcomm Snapdragon AR1 protsessori bilan jihozlanadi.
Uning ichki qismidan 155 milliamper-soat quvvatga ega akkumulyator hamda yuqori sifatli tasvirlarni ta’minlovchi 12 megapikselli Sony sensori o‘rin oladi. Shuningdek, ko‘zoynak simsiz internet va ma’lumot almashish uchun Wi-Fi hamda Bluetooth modullari bilan ta’minlanadi.
Dastlabki ma’lumotlarga ko‘ra, Galaxy Glasses qurilmasining narxi 379 dollardan 479 dollargacha bo‘lishi kutilmoqda. Yangi mahsulotning rasmiy sotuvga chiqishi 2026-yilga mo‘ljallangan.
Kompaniyaning uzoq muddatli rejalariga ko‘ra, 2027-yilda ushbu ko‘zoynakning yanada takomillashgan, ya’ni mitti yorug‘lik tarqatuvchi diodli displeyga ega bo‘lgan versiyasi ham taqdim etilishi ehtimoli bor. Mazkur texnologiya foydalanuvchilarga raqamli ma’lumotlarni bevosita ko‘z oldida ko‘rish imkonini beradi.
