Meta tadbirkorlar uchun suniy intellekt vositalarini rivojlantirmoqda
Meta kompaniyasining tadbirkorlar uchun ishlab chiqilgan suniy intellekt vositalari jadal rivojlanmoqda. Bu haqda Zamin.uz xabar berdi.
Mart oyi yakunlariga ko‘ra, ushbu tizimlar orqali haftasiga 10 millionga yaqin muloqot amalga oshirilgan. Taqqoslaydigan bo‘lsak, yil boshida bu ko‘rsatkich atigi 1 millionni tashkil etgan edi.
Mazkur ma’lumotlarni xalqaro texnologiya nashrlari e’lon qildi. Hozirgi vaqtda sakkiz milliondan ortiq reklama beruvchilar kompaniyaning kamida bitta aqlli vositasidan foydalanmoqda.
Ayni damda ushbu imkoniyatlar kichik biznes vakillari uchun mutlaqo bepul taqdim etilmoqda. Bu esa ko‘plab tadbirkorlarga o‘z mijozlari bilan aloqani yaxshilash va ish jarayonlarini optimallashtirish imkonini bermoqda.
Kompaniya rahbari Mark Sukerberg kelajakda ushbu xizmatlar pullik asosga o‘tkazilishi mumkinligini bildirdi. Uning ta’kidlashicha, xabar almashish ilovalaridagi biznes yo‘nalishidagi suniy intellekt hozircha bepul bo‘lsa-da, uzoq muddatli daromad olish modeli ustida faol ish olib borilmoqda.
Meta o‘zining tijoriy mahsulotlariga aqlli texnologiyalarni joriy etishni davom ettirmoqda. Xususan, maxsus laboratoriya tomonidan ishlab chiqilgan yangi modellar ishga tushirilgan bo‘lib, ular biznes jarayonlarini yanada samarali qilishga xizmat qiladi.
Moliyaviy natijalar ham kompaniyaning muvaffaqiyatini tasdiqlamoqda. Birinchi chorak yakunlariga ko‘ra, Meta kompaniyasining sof foydasi 26,8 milliard dollarni tashkil etdi.
Umumiy daromadlar esa o‘tgan yilning shu davriga nisbatan 33 foizga oshib, 56,3 milliard dollarga yetgan. Bu ko‘rsatkichlar kompaniyaning yangi texnologiyalarga kiritayotgan sarmoyalari o‘z mevasi bilan qaytayotganini ko‘rsatadi.
